شەنەۋنىكتەر بەكبولات تىلەۋحاننىڭ ارەكەتىن «كوزبوياۋشىلىق» دەپ اتادى
اتا-انالار مەن وقۋشىلاردىڭ كوپتەگەن ارىز-شاعىمىنان سوڭ، شەنەۋنىكتەر ارنايى كوميسسيا قۇرىپ، بارلىق كىتاپتاردىڭ مەكتەپ باعدارلاماسىنا سايكەستىگىنەن باستاپ، ءارىپ قاتەلەرىنە دەيىن تەكسەرمەكشى، - دەپ حابارلايدى ك ت ك ارناسى.
تەك سونىڭ ناتيجەسىنە كوميسسيا مۇشەلەرىنىڭ ءوزى كۇمانمەن قاراپ وتىر. العاشقى وتىرىستا-اق ماجىلىسمەندەر ءبىلىم ۆيتسە-مينيسترىمەن شەكىسىپ قالدى. وقۋلىقتارداعى قاتەنى شۇقىپ كورسەتكەن بەكبولات تىلەۋحان ۇناماي قالسا كەرەك، ءمينيستردىڭ ورىنباسارى دەپۋتاتتىڭ ارەكەتىن «كوزبوياۋشىلىق» دەپ اتادى.
مەكتەپ وقۋلىقتارى توڭىرەگىندەگى داۋ ورشىمەسە باسىلاتىن ءتۇرى جوق. اسىرەسە، كىتاپ بەتتەرىندە ءورىپ جۇرگەن قاتە، تۇسىنىكسىز تاپسىرما وقۋشىلار مەن اتا-انالاردى ابدەن مەزى ەتكەن. ول ازداي، وقۋلىقتى رەتتەۋى ءتيىس كوميسسيا مۇشەلەرى مەكتەپ باعدارلاماسىنان تاعى دا شيكىلىپ تاۋىپ وتىر.
«قازاق ءتىلى مەن ادەبيەتتى نەگە بىرىكتىرىپ جىبەرگەن؟ گەومەتريا مەن الگەبرانى بىرىكتىرۋگە بولمايتىن سياقتى ءتىل دەگەن گرامماتيكا، ادەبيەت حريستوماتيالىق نەگىزدە. ول نەگە بىرىكتىرىلگەن؟ قاتە. سوسىن مىنا قازاق ادەبيەتىنە ەڭبەك جانە كليماتتىق جاعداي دەگەننىڭ قانداي قاجەتى بار؟»، - دەدى ءماجىلىس دەپۋتاتى بەكبولات تىلەۋحان.
مۇنداي قاتەلەردى تۇزەتۋ ءۇشىن كوميسسيا مۇشەلەرى وقۋلىقتى دايىنداۋ جۇيەسىن تۇبەگەيلى وزگەرتۋ قاجەت دەيدى. ياعني، كىتاپ ازىرلەۋدى قازىرگىدەي باسەكەلەس ورتاعا بەرمەۋ كەرەك. ويتكەنى، باسپامەن اينالىساتىن بيزنەسمەندەر اقشا تابۋدى عانا كوزدەپ، وقۋلىقتىڭ مازمۇندىق ساپاسىنا سالعىرت قارايدى ەكەن. ءبىراق، مۇنداي ۇسىنىس ءبىلىم ۆيتسە-مينيسترىنە ۇناماي قالعان سەكىلدى. ءتىپتى، ەلميرا سۋحانبەرديەۆا ءسوز اراسىندا تىلەۋحاندى كوزگە تۇسكىسى كەلەتىن «پوپۋليست» دەپ ايتىپ قالدى.
«پوپۋليزم ەمەس، ەلميرا. بۇل جانىمنىڭ اۋىرعان نارسەسى. پوپۋليزم ەمەس. ۋااللاحي پوپۋليزم ەمەس. قۇدايدىڭ اتىمەن انت ەتەيىن پوپۋليزم ەمەس. - بەكە ءبىز ونى الىپ تاستادىق قوي. - الىپ تاستاعان جوقسىزدار! ءسوز بولمەڭىزدەر»، - دەيدى ءماجىلىس دەپۋتاتى بەكبولات تىلەۋحان.
بۇدان كەيىن دە دەپۋتات پەن ۆيتسە-مينيستر ءبىرازعا دەيىن داۋلاستى. ءوزىن «پوپۋليست» دەگەنگە قاتتى رەنجىسە كەرەك، تىلەۋحان جيىن سوڭىندا شەنەۋنىكتىڭ تاعى بەتىن قايتارىپ تاستادى.
«بەكبولات تىلەۋحان مىرزاعا العىس ايتقىم كەلەدى. نەگە دەسەڭىزدەر، قانشاما وسىنداي پاندىك كوميسسيانىڭ ىشىندە دەپۋتات بار قاتىسقانى بىرەۋ عانا. ول بەكەڭ مىرزا. وسى كىسى عانا بىزگە كومەكتەسىپ جاتىر»، - ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا.
«كومەكتەسىپ جاتقانىم جوق مەن قارسىمىن. مەن بۇعان كومەكتەسپەيمىن. قۇداي بۇعان كومەكتەسىپ، ۇرپاقتىڭ قارعىسىنا قالۋدان ساقتاسىن»، - دەيدى تىلەۋحان.
وسىلايشا، مەكتەپ وقۋلىقتارىن رەتتەۋى ءتيىس كوميسسيانىڭ العاشقى وتىرىسى ايعاي شۋمەن اياقتالدى. ەندى ولار ەلىمىزدەگى بارلىق باسپالاردىڭ كىتابىن تەكسەرىپ، مەكتەپ باعدارلاماسىنا سايكەستىگىن تەكسەرىپ شىعۋى ءتيىس. ءسويتىپ، وقۋلىقتاعى ولقىلىقتار تۇزەلەدى دەگەن ءۇمىت بار.
