يسلام كاريموۆتىڭ قىزى گولليۆۋد جۇلدىزدارى مەن قازاقستاندىق كاسكادەرلار قاتىسقان عالىم ۇلىقبەك تۋرالى فيلم ءتۇسىردى - فوتو

استانا. قازاقپارات - شىعىس عالىمى  ۇلىقبەك تۋرالى دەرەكتى فيلم ءتۇسىرىلدى.

بۇل تۋرالى بۇرىنعى وزبەكستان پرەزيدەنتىنىڭ كەنجە قىزى لولا كاريموۆا- تيلليايەۆا فەيسبۋكتاعى پاراقشاسىندا حابارلادى.

«پاراقشامدا «ۇلىقبەك. جۇلدىز الەمىنە قيىن ساپار» دەرەكتى فيلمنىڭ جارىققا شىعاتىنىن حابارلايمىن. بۇل جۇبايىم تيمۋر ەكەۋىمىزدىڭ كينوپروديۋسەر رەتىندەگى بىرلەسكەن العاشقى ەڭبەگىمىز»، - دەپ جازادى لولا.

دەرەكتى فيلم ورتاعاسىرلىق عالىم جانە تانىمال ويشىل  ۇلىقبەكتىڭ ءومىرى مەن ەڭبەكتەرىنە ارنالعان.



«فيلم ءتۇسىرۋ تۋرالى بۇرىننان ويىم بار ەدى.  ۇلىقبەك ەنتسيكلوپەديالىق ءبىلىمى بار، تانىمال عالىم جانە بەيبىتشىلىكتى قالاعان باسقارۋشى بولعانى ءمالىم.  ۇلىقبەكتىڭ اتى ادامزات تاريحىنداعى بەلگىلى - گاليلەو گاليلەي، كوپەرنيك، دجواناس كەپلەر سەكىلدى دۇنيەجۇزىلىك عالىمعا ولشەۋسىز ۇلەس قوسقان عالىمدارمەن بىرگە اتالادى.  ۇلىقبەك بيلەۋشى بولعان تۇستا سامارقاند استرونوميا سالاسىنداعى الدىڭعى قاتارلى زەرتتەۋلەر جاساعان حالىقارالىق ورتالىققا اينالدى.  ۇلىقبەك سالدىرعان راسىتحانا (وبسەرۆاتوريا) سول زامانداعى تانىمال عالىمداردىڭ باسىن قوستى»، - دەيدى فيلمدى ءتۇسىرۋشى.

ول 1118 جۇلدىزدىڭ سيپاتتاماسى بار اسپان كارتاسىن جاسادى، جىلدىڭ ۇزاقتىعىن 25 سەكۋند ايىرمامەن ەسەپتەپ شىعاردى. «ءبىز فيلم ستسەنارييىمەن ۇزاق ءارى تىڭعىلىقتى جۇمىس جاسادىق. وندا اتاقتى عالىمنىڭ ءومىرىن تولىق كورسەتەمىز. كارتينانىڭ رەجيسسەرى باحودىر يۋلداشيەۆپەن جاس كەزىمىزدەن بەرى تانىسپىز. ونىمەن كەزدەسكەن كەزدە مەن جوبا تۋرالى ايتتىم، ول قۋانا كەلىسىمىن بەردى. فيلمدى تۇسىرۋگە وكسفورد ۋنيۆەرسيتەتىنىڭ بودليانسكايا كىتاپحاناسى، بريتانيا مۋزەيى، پريستون ۋنيۆەرسيتەتى، گريففيتا وبسەرۆاتورياسى، كوك جاعالاۋ وبسەرۆاتورياسى (فرانسيا)، كاليفورنيا ۋنيۆەرسيتەتىنىڭ كىتاپحانالارى، The David Collection كوپەنگاگەن مۋزەيى، وكسفوردتاعى قاسيەتى دجون كوللەدجىندەگى وكسفورد تاريح عىلىمدارىنىڭ مۋزەيىندەگى دەرەكتەر پايدالانىلدى.

تۇسىرىلىمگە وزبەكستاندىق جانە قازاقستاندىق كاسكادەرلار جۇمىلدىرىلدى، سونداي-اق سول زامانعا ساي كيىمدەردى تاڭداپ الۋعا بارىنشا ءمان بەرىلدى.



فيلمگە دۇنيەجۇزىلىك كينەماتوگرافيانىڭ جۇلدىزدارى - ۆينسەنت كاسسەل، ارماند اسسانتە، فرانسيسكو وۆاللەلەر قاتىستى. سونداي- اق وزبەكستاندىق كينو شەبەرى ماعرۋفا وتاجونوۆا، جاۆاحير زاكيروۆ مەن حاشيم ارسلانوۆتاردىڭ ەڭبەگىن ايتا كەتۋ كەرەك.

فيلم سازىن تانىمال گولليۆۋدسكيي كومپوزيتورى ۋولتەر افاناسيەۆ جازدى. ول «تيتانيك»، «الاددين»، «نوتر- دامدىق بۇكىر»، «گەركۋلەس» جانە تاعى دا باسقا كينولارعا مۋزىكا جازعان. ءفيلمنىڭ تۇساۋكەسەرى تۋرالى ءبىز كەيىنىرەك حابارلايتىن بولامىز»، - دەيدى لولا كاريموۆا- تيلليايەۆا.

 

اۆتور: جانىبەك امانگەلدى