نەسيە مەن سۋبسيديا ۇساق وندىرۋشىلەرگە دە بەرىلە باستادى
بۇل ورايدا ب ا ق- تىڭ الەۋەتى كەڭىنەن پايدالانىلۋدا. «جەتىسۋ» تەلەارناسىندا تىكەلەي ەفيرگە شىققان وبلىستىق اۋىل شارۋاشىلىعى باسقارماسىنىڭ باسشىسى سەكسەمباي بەكىشوۆ، «اۋىل شارۋاشىلىعىن قارجىلاي قولداۋ قورى» وڭىرلىك فيليالىنىڭ ديرەكتورى ءمادي يبادۋللايەۆ پەن «اگرارلىق نەسيە كورپوراتسياسى» ا ق وبلىستىق فيليالىنىڭ ديرەكتورى تولەباي مەڭدورازوۆ كورەرمەندەردى تولعاندىرعان كوپتەگەن ساۋالدارعا جاۋاپ بەردى، دەپ حابارلايدى قازاقپارات الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
وبلىستىق اۋىل شارۋاشىلىعى باسقارماسىنىڭ باسشىسى سەكسەنباي بەكىشيەۆتىڭ ايتۋىنشا، جاڭا باعدارلاما مال جانە وسىمدىك شارۋاشىلىقتارىنىڭ تيىمدىلىگىن ارتتىرۋعا، تاۋارلىق وندىرىسكە 500 دەن استام جەكە قوسالقى شارۋاشىلىقتى تارتۋ ءۇشىن اۋىل شارۋاشىلىعى كووپەراتسيالارىن كەڭ كولەمدە دامىتۋعا، ءونىمدى وڭدەۋ مەن وتكىزۋدىڭ ءتيىمدى جۇيەسىن قۇرۋعا مۇمكىندىك بەرەتىنىن ايتتى.
مەملەكەتتىك قولداۋ دا الدەقايدا ءتيىمدى ءارى قولجەتىمدى بولماق. «بۇرىن نەسيە مەن سۋبسيديا ءىرى تاۋار وندىرۋشىلەرىنە قولجەتىمدى بولسا، قازىرگى كەزدە ۇساق جانە ورتا وندىرۋشىلەرگە دە باعىتتالاتىن بولادى. ونىڭ ىشىندە كووپەراتيۆتەرگە بىرىككەن جەكە قوسالقى شارۋاشىلىقتارعا دا قولجەتىمدى»، - دەدى سەكسەمباي بەكىشوۆ.
ۇمىتكەرلەردىڭ ءتيىستى مەكەمەگە جۇگىنۋىنەن باستاپ ميكروكرەديتكە قول جەتكىزۋىنە دەيىنگى ارالىقتاعى بارلىق ساتىلاردى جىكتەپ ايتىپ بەرگەن باسقارما باسشىسى مەملەكەتتەن وبلىسقا 3 ميلليارد تەڭگەدەن اسا قاراجات بولىنگەنىن تىلگە تيەك ەتتى.
سونىمەن بىرگە، ميكروكرەديتتەر كوكتەمگى دالا جانە ەگىن جيناۋ جۇمىستارىن جۇرگىزۋگە ءۇش جىلدان اسپايتىن مەرزىمگە 4 ميلليون تەڭگەگە دەيىن بەرىلمەك. سونداي-اق، بولىنگەن قاراجاتتىڭ 60 پايىزى «اۋىل شارۋاشىلىعىن قارجىلاي قولداۋ قورى» ا ق، 40 پايىزى «اگرارلىق نەسيە كورپوراتسياسى» ا ق جانە كرەديتتىك سەرىكتەستەرى مەن ميكروقارجى ۇيىمدارى ارقىلى بەرىلەدى.
تىكەلەي ەفير بارىسىندا سالا باسشىلارى باعدارلامانىڭ باسىم باعىتتارى، ونىڭ وزگە باعدارلامالاردان ايىرماشىلىعى، شاعىن نەسيە بەرۋ، جەكە شارۋاشىلىقتاردى كووپەراتيۆتەرگە بىرىكتىرۋ، كوكتەمگى دالا جۇمىستارىن نەسيەلەندىرۋ، ءىسىن جاڭا باستاعان كاسىپكەرلەردى قولداۋ، كاسىپكەرلىك نەگىزدەرىنە وقىتۋ، بيزنەستى قارجىلاندىرۋ سياقتى ماسەلەلەرگە قاتىستى قويىلعان سۇراقتارعا جاۋاپتار قايتاردى.
ءمادي يبادۋللايەۆتىڭ ايتۋىنشا، بەرىلەتىن نەسيەنىڭ سوماسى وسكەن، ونى وتەۋ مەرزىمى ۇزارتىلعان. ال پايىزدىق مولشەرلەمەسى سول كۇيىندە قالدىرىلدى. قويىلعان ساۋالدارعا جاۋاپ بەرۋ بارىسىندا تولەباي مەڭدورازوۆ «كازاگرو» «ىسكەر» باعدارلاماسى بويىنشا جۇمىس ىستەپ جاتقانىن جەتكىزدى.
سەرۆيستىك-دايىنداۋ ورتالىقتارى، ءونىمدى ساقتاۋ مەن وڭدەۋ، سول سياقتى ءسۇت پەن ەتتى ءوندىرۋ ءىسى دە نەسيەلەندىرىلەدى. قارجىلاي قولداۋ قورى «ىنتىماق» سالالىق باعدارلاماسى شەڭبەرىندە دە كومەك كورسەتىلەتىنى ايتىلدى.
اۆتور: سامال قابىشيەۆا
