سۇلتان بەيبارىس جايلى اراب تىلىندەگى قۇندى ەڭبەك قازاقشاعا اۋدارىلدى

 استانا. قازاقپارات -  «سۇلتان زاھير بەيبارىستىڭ ءومىربايانى» - بۇل قازاق ەلىندە تۋىلىپ، قاپىدا قۇلدىققا ءتۇسىپ، جات ەلدە ءجۇرىپ سول قامىتتان ارىلىپ سۇلتاندىققا دەيىن كوتەرىلگەن بابامىز جايلى ارابتاردىڭ تامسانا جازعان ەڭبەگى.

 مىسىر مەن شام ەلدەرىنىڭ تاۋەلسىزدىگىن ساقتاۋىمەن، مۇسىلمان الەمىندە ءبىلىم- عىلىمنىڭ، مادەنيەتتىڭ دامۋىنا ەلەۋلى ۇلەس قوسۋىمەن تاريحتا وشپەس ءىز قالدىرعان بەيبارىس بابامىز جايلى شىعارمالار وتە كوپ، سونىڭ ىشىندە ەڭ قوماقتىسىنىڭ ءبىرى سۇلتان سيراسى (ءومىربايانى) جايلى اراب تىلىندە 5 تومدىق كىتاپ جازىلعان. ەندى سول قۇندى ەڭبەكتىڭ العاشقىسى انا تىلىندە «اق جايىق» باسپاسىنان ەكى كىتاپ بولىپ جارىققا شىقتى.

 اراب ەپوسىن قازاقشا سويلەتكەندەر: ى. پالتورە، ق. ساندىبايەۆ، ج. ساريەۆ، ج. وماربەكوۆ. مونعول شاپقىنشىلىعى مەن كرەست جورىقتارىنا تويتارىس بەرىپ، مۇسىلمان ەلىن قورعاپ قالعان ماملۇكتەر مەملەكەتىنىڭ داڭقتى سۇلتاندارىنىڭ اتاقتىسىنا، تاريحي تۇلعاسىنا اينالعان بەيبارىس بابامىزعا مىسىر حالقىنىڭ العىسى ولشەۋسىز. سول سەبەپتى سۇلتان بەيبارىس -  بۇگىندە قازاقستان مەن مىسىرعا تەڭ  ورتاق تۇلعا.

 ول دۇنيەدەن وتكەننەن كەيىن دە مىسىردا ەل جادىنان شىقپاي، كوپتەگەن اڭىز- اڭگىمەلەردىڭ ارقاۋ وزەگىنە اينالدى، داڭقى ارتا تۇسكەن. ءالى كۇنگە بەيبارىس جايلى تۋىندى مىسىرلىقتاردىڭ اسا ءسۇيىپ وقيتىن، دارىپتەيتىن تۋىندىسى. الايدا وسى دارا تۇلعانىڭ ءومىرىنىڭ جۇمباق، بەيمالىم جاقتارى از ەمەس. كەيدە وسىنداي تۇستاردى ايعاقتايتىن قۇجاتتار سيرەك بولعانىمەن، كەرىسىنشە، اۋىزشا اڭگىمەلەر بارشىلىق. سول ەل اۋزىنداعى اڭگىمە- اڭىزدار جيناقتالا كەلە، باسى قۇرالىپ، كوركەمدىك بوياۋ جامالعان، تۇتاس، اۋقىمدى سيرا پايدا بولعان. وندا ۇلتتىق باتىر، قاھارمان دەڭگەيىندە قاستەرلەنىپ، دارىپتەلگەن.

 «سۇلتان بەيبارىس» سيراسى اعىلشىن زەرتتەۋشىلەرىنىڭ نازارىن اۋدارتىپ، فرانسۋز، ورىس ءتىلى سەكىلدى بىرنەشە تىلگە اۋدارىلعان. وسى كەزگە دەيىن وزىمىزدە بابامىز جايلى ەڭبەكتەر ورىس تىلىنەن ءتارجىمالانسا، جاڭا كىتاپ ءتۇپنۇسقادان ياعني اراب تىلىنەن تىكەلەي اۋدارىلدى.

 «مىسىر حالقىنىڭ «سۇلتان بەيبارىس» سيراسى سىندى اسا قۇندى، عاجايىپ مۇراسىنىڭ تولىقتاي قازاقشا سويلەۋى رۋحاني قازىنامىز بايىتا تۇسپەك. ەندى ەپوستىڭ قالعان تومدارى انا تىلىمىزگە اۋدارىلىپ جارىق كورسە دەيمىز» ، - دەپ فيلول. ع. د. , پروفەسسور ءشامشادين كەرىم كىتاپ جايلى ءوز پىكىرىن بىلدىرگەن.

 بەس تومنىڭ العاشقىسى عانا كولەمدى ەكى كىتاپ بولىپ وقىرمانعا جول تارتقان „سۇلتان زاھير بەيبارىستىڭ ءومىربايانى„ جايلى ءالى تۇرتىلمەگەن 4 تومى دا بابامىزدىڭ تۋعان حالقىمەن قايتا قاۋىشاتىن كۇن جاقىن بولسا دەگەن نيەتتەمىز.

ايشا كەڭەسباي «نۇر- مۇباراك» ۋنيۆەرسيتەتىنىڭ باسپا ءسوز قىزمەتى