نامازالى وماش ۇلى: «ەگەمەن قازاقستان» گازەتىنىڭ ارحيۆى وتە باي. ونىڭ ءبىر بولىگى توتە جازۋ نۇسقاسىندا
دەپ حابارلايدى قازاقپارات.
سيفرلى قازاقستان باعدارلاماسى اياسىندا قولعا الىنعان شارالاردىڭ العاشقىسى - «ەگەمەن قازاقستان» گازەتىنىڭ ارحيۆىندەگى بارلىق ءنومىرىن تۇگەندەۋ جانە تۇگەلدەي سيفرلى نۇسقاعا كوشىرۋ. باس باسىلىمنىڭ 100 جىلدىق مەرەيتويىنا ورايلاستىرىپ قولعا الىنعان جوبانىڭ جالپى جۇرتشىلىق ءۇشىن ماڭىزى زور.
«1919 -جىلدىڭ 17 - جەلتوقسانىندا «ۇشقىن» دەگەن اتاۋمەن شىققان كەزىنەن باستاپ، سودان كەيىنگى جىلدارداعى «ەڭبەك تۋى»، «ەڭبەكشىل قازاق»، «ەڭبەكشى قازاق»، «سوتسيالدى قازاقستان»، «سوتسياليستىك قازاقستان»، «ەگەمەندى قازاقستان»، «ەگەمەن قازاقستانعا» دەيىنگى ساندارىنىڭ تولىق سيفرلى مۇراعاتى جيناقتالاتىن بولادى. جالپى ەل گازەتىندە قازاقستاننىڭ 100 جىلدىق تاريحىن دا ايقىن كورۋگە بولادى. ويتكەنى، مۇندا شەجىرەلى جىلداردىڭ بارلىق بەلەستەرى كورىنىس تاپقان، باس باسىلىم زار زامانداعى جاعدايلاردان دا اينالىپ وتە الماعان. اشارشىلىق، زۇلمات، سوعىس جىلدارى، تىڭ يگەرۋ ماسەلەلەرىنىڭ بارلىعى سول كەزەڭنىڭ تىلىمەن بىزگە جەتىپ وتىر»، - دەيدى «ەگەمەن قازاقستان» گازەتى ا ق پرەزيدەنتى دارحان قىدىرالى.
ونىڭ ايتۋىنا قاراعاندا، گازەت ارحيۆتەرىن سيفرلى نۇسقاعا اۋىستىرۋ كوپتەگەن مۇمكىندىكتەرگە جول اشپاق. ماسەلەن، وسى ارقىلى وقىرمان دا، ىزدەنۋشى عالىمدار دا گازەتتىڭ وتكەن جىلدارداعى كۇنىن تەرۋ ارقىلى كەز كەلگەن سانىنان ونداعى ماتەريالدارمەن تانىسا الادى. بۇدان بولەك، «ەگەمەن قازاقستان» گازەتىنىڭ ءجۇرىپ وتكەن جولى 10 تومدىق كىتاپ بولىپ باسىلىپ شىقپاق. بۇل ەل گازەتىنىڭ 100 جىلدىق مەرەيتويى قارساڭىندا اياقتالادى دەپ جوسپارلانعان. ون تومدىق جوباسىنا قاتىسۋشىلاردىڭ ءبىرى نامازالى وماش ۇلى زەرتتەۋ جۇمىستارىن جاساي ءجۇرىپ، «ەگەمەن قازاقستاننىڭ» ارحيۆىن ءۇش رەت قاراپ شىققانىن ايتتى.
«ول نومىرلەر ءتورت جەردە ساقتاۋلى. ءبىراز بەتتەرى جوعالعان، قيىلعان. ال ەندى سول ارحيۆ ەلەكتروندى فورماتقا كوشىرىلسە نەمەسە ول ارحيۆ ون تومدىق كىتاپ بولىپ شىقسا، زەرتتەۋشىلەر ءۇشىن باعا جەتپەس سىيلىق بولعالى تۇر. ويتكەنى، «ەگەمەن قازاقستاننىڭ» ءارحيۆى وتە باي. ونىڭ ءبىر بولىگى توتە جازۋ نۇسقاسىندا، ولاردى كيريلليتساعا كوشىرۋ قاجەت» ، دەدى نامازالى وماش ۇلى.
جيناقتىڭ العاشقى التى تومى كەلەسى جىلى شىعادى، ال باسىلىمنىڭ 100 جىلدىعىنا قاراي ون تومدىق تولىعىمەن وقىرمان نازارىنا ۇسىنىلماق. گازەتتىڭ قولعا العان كەلەسى ءبىر جوباسى «سيفرلى قازاقستان: ماڭگىلىك ەل مۇرالارى» دەپ اتالادى. ۋيكي- ءبىلىم قورىمەن بىرلەسىپ اتقارىلاتىن جوبا ارقىلى ەلىمىزدىڭ عالامتورداعى اقپاراتتىق- يميدجدىك بەتبەينەسىنىڭ تانىلىمىن ارتتىرۋعا باعىتتالادى. بۇل رەتتە «ەگەمەننىڭ» اسا باي فوتومۇراعاتىندا ساقتالعان، ەل تاريحىنان، تاۋەلسىزدىكتىڭ سىندارلى ساتتەرى مەن جارقىن جەتىستىكتەرىنەن حابار بەرەتىن قازاقستاننىڭ قالالارى مەن كورىكتى مەكەندەرى تۋرالى سيرەك فوتوسۋرەتتەر ۇسىنىلادى.
«جوبانىڭ ارتىقشىلىعى سيفرلى قالىپقا كوشىرىلگەن فوتوسۋرەتتەر Wikimedia Commons رەپوزيتاري جۇيەسىنە جۇكتەلەدى. ءاربىر فوتوعا قازاق، ورىس، اعىلشىن تىلدەرىندە تۇسىندىرمەلەر بەرىلەدى. الەمنىڭ قاي قيىرىنان بولماسىن، قازاقستان تۋرالى اقپارات العىسى كەلگەندەر، ەلىمىزبەن تانىسقىسى كەلەتىندەر وسىنداي قۇندى فوتولارعا قول جەتكىزە الادى»، - دەيدى باسىلىم جەتەكشىسى دارحان قىدىرالى. سونداي- اق، ەگەمەن قازاقستان گازەتى جاڭا پورتالىنىڭ جوباسىن دا تانىستىردى. ەرەكشە ديزاينمەن جاسالعان egemen.kz پورتالى 22 - ناۋرىز كۇنى ىسكە قوسىلادى. جيىنعا قاتىسقان اعا بۋىن وكىلدەرى، زيالى قاۋىم زاماناۋي جوبالاردىڭ ماڭىزدىلىعىن ايتىپ، ناۋرىز قارساڭىندا قولعا الىنعان ىستەرگە يگىلىك تىلەدى.
اۆتور: قانات مامەتقازى
