شىمكەنتتە ءبىر وتباسىنىڭ جەتى مۇشەسى قولونەرمەن اينالىسادى - فوتو

شىمكەنت. قازاقپارات - شىمكەنتتە ءبىر وتباسىنىڭ جەتى بىردەي مۇشەسى قولونەرمەن اينالىسادى. قازاقتىڭ كونە قولونەرىن دارىپتەپ جۇرگەن بەيىسبەكوۆتەر اۋلەتى بۇگىندە كيىزدەن ءتۇرلى جاساۋ جاساپ، بىلعارىدان بۇيىمدار دايىندايدى، دەپ حابارلايدى قازاقپارات ح ا ا ءتىلشىسى.

 بولات بەيىسبەكوۆتىڭ ۇيىندەگى جەتى جان قازاقتىڭ قولونەرىن كاسىپ قىلىپ، كوپشىلىككە دارىپتەۋدە. كىلەڭ سۋرەتشىلەر جينالعان جانۇيادا تۇسكيىز توقيدى، سۋرەت سالادى، ەر- تۇرمان سوعادى. شەبەرلەردىڭ ۇشقىر قيالىنان تۋىنداعان ءاربىر دۇنيەدە قازاق حالقىنىڭ تىڭ تاريحى، سالت- ءداستۇرى، ادەپ- عۇرپى ۇيلەسىم تاپقان. ماسەلەن، قىز- كەلىنشەكتەر شەبەرحانادا ۇمىت بولا باستاعان كيىز باسۋ مەن الاشا توقۋدى دامىتۋدا. جۇننەن ءجىپ ءيىرىپ، كىلەم توقيدى. ۇيرەنگىسى كەلەتىندەرگە قازاقتىڭ شاشاعىن جاساپ كورسەتەدى. ول ءۇشىن ارنايى كۋرستار ۇيىمداستىرىلادى ەكەن. تۇڭعيىقتا قالىپ قويعان شاشاقتى دۇنيەلەردى سۋىرىپ الىپ، قازىرگى زامان تالابىنا ساي ەتىپ جاساپ شىعارۋدا. سونداي- اق كيىز باسىپ، كيىم شىعارادى. تابيعي ونىمنەن جاسالعان سىرت كيىمدەر مەن ۇيدە كيەتىن اياق كيىمدەرگە سۇرانىس تا ارتىپ وتىر.

« ءجۇندى ورتەپ جاتىر دەگەندى ەستىپ، سودان كەيىن وسى جۇنمەن جۇمىس ىستەۋدى ويلاندىق. قازىرگى تاڭدا سول كوبىنەسە مەرينوس قويدىڭ جۇنىنەن سىرت كيىمدەر، ويۋلانعان كامزولدار جاسايمىز. ءوزىمىزدىڭ دە جەرگىلىكتى جۇندەردى قولدانامىز. ونى اياق كيىم، پيما دەگەندەرگە پايدالانامىز. ءقازىر مىنا اياق كيىمگە سۇرانىس وتە كوپ بولىپ جاتىر. اسىرەسە، كىشكەنتاي بالالارعا ارنالعان اياق كيىمدەر جاقسى وتۋدە. تابيعي ءونىم اياقتى تەرلەتپەيدى، ونىڭ ۇستىنە دەنەدەگى سۋىقتى تارتىپ الادى. باعالارى ءارتۇرلى. 2-5 مىڭ تەڭگەنىڭ ارالىعىندا، - دەيدى وتاناسى.

 بۇل اۋلەتتىڭ گالەرەياسىنان كەز كەلگەن كوركەم تۋىندىنى كەزدەستىرە الاسىز. اكەسى مەن بالاسى بىلعارىدان جاساعان ەر توقىم كوزدىڭ جاۋىن الادى. مازمۇنى ءماندى كەسكىندەمەنىڭ ايتاتىن استارلى ويى دا تەرەڭ. شەبەرلەردىڭ كوز مايىن تاۋىسىپ جاساعان ءاربىر بۇيىم تاريحپەن استاسىپ جاتىر. ولار قولدانبالى ونەردىڭ ەڭ كونە ءتۇرى سانالاتىن قۇمىرا جاساۋدى دا قايتا قالپىنا كەلتىرىپتى. وعان قاجەتتى توپىراقتى سىر وزەنىنىڭ بويىنداعى ساز بالشىقتان الىپ كەلەدى ەكەن. ءتىپتى قولونەردىڭ شىڭى سانالاتىن زەرگەرلىك بۇيىمدارعا دەيىنگىنىڭ ءبارى وسىندا. عاسىرلار بويى اتادان بالاعا مۇرا بوپ قالعان قولدانبالى ونەردى ناسيحاتتاۋشى جاندار كونە بۇيىمداردىڭ جاسالۋ ءتاسىلىن دە ۇيرەتەمىز دەيدى. قيالى ۇشقىر شەبەرلەردىڭ قولىنان شىققان دۇنيەلەر قاراپايىم بولعانىمەن، تامىرى تەرەڭ سالت- ءداستۇرىمىزدى دارىپتەۋمەن ەرەكشەلەنەدى. قولىنان ءىس كەلەتىن جاندار بويىمىزداعى قاسيەتىمىزدى جاستارعا ۇيرەتىپ كەتسەك دەپ وتىر.

 ونەردىڭ سان ءتۇرىن مەڭگەرگەن شەبەرلەر وتباسى ۇلتتىق بۇيىمدار مەن كوزدىڭ جاۋىن الار كادەسىيلار كورمەلەرىنە قاتىسىپ، بىرنەشە ەلدەردى ارالاپ كەلگەنىن ايتادى. جىل سايىن شەتەلدىك ارىپتەستەرىمەن تاجىريبە الماسىپ، ونەرىمىزدى دامىتىپ وتىرامىز. مەملەكەتتەن قولداۋ بولسا، ءىسىمىزدى ودان ءارى دامىتاتىن ەدىك، - دەيدى.

«بىلعارىدان جاسالعان، باسقا دا بۇيىمداردى ءبىز ءوزىمىز قولمەن جاسايمىز. ال ونىڭ ءبارىنىڭ دۇنيەجۇزىلىك دەڭگەيدە جاسايتىن قۇرالدارى بار. ەگەر سول ستانوكتار بولاتىن بولسا، بىرىنشىدەن نارىقتى جاۋلاۋعا بولادى. قازىر ءبىزدىڭ نارىقتى كورسەڭىزدەر «قازاقستان» دەپ جازىپ قويعان، ءبىراق ءبارى قىرعىزستان، وزبەكستان، قىتايدىڭ جۇمىستارى»، - دەيدى قولونەرشى بولات بەيىسبەكوۆ.

 اۆتور: اينۇر اقبايەۆا