الماتىدا جاستاردىڭ ورتالىعى اشىلدى - فوتو
اسىرەسە، ەلىمىزدىڭ تۇكپىر-تۇكپىرىنەن كەلىپ، ءبىلىم الىپ، ەڭبەك ەتىپ جۇرگەن جاستاردىڭ باسىن قوسىپ وتىرعان الماتىنى جاستار قالاسى دەپ اتاۋعا تولىق نەگىز بار.
الماتى جاستارىنىڭ ءوز مۇمكىندىكتەرىن تولىق پايدالانىپ، ينتەللەكتۋالدىق، شىعارماشىلىق قابلەتتەرىن دامىتۋ ماقساتىندا الماتى قالاسىنىڭ جاستار كونگرەسسى ستۋدەنتتەر اليانسىمەن بىرلەسە وتىرىپ، «Moskvа Metropolitan» ساۋدا ورتالىعىندا جاستار ورتالىعىن اشتى، دەپ حابارلايدى قازاقستان جاستارى كونگرەسىنىڭ باسپا ءسوز قىزمەتى.
ورتالىقتىڭ اشىلۋ سالتاناتى اعىمداعى جىلى 11 -ناۋرىزدا ءوتتى. ۇيىمداستىرۋشىلاردىڭ ايتۋىنشا، بۇل الماتى قالاسىنىڭ جاستارىنا بوس ۋاقىتىن ءتيىمدى پايدالانۋى ءۇشىن جاسالعان قامقورلىق جانە ەلدە جاستار ساياساتىن دامىتۋعا باعىتتالعان ناقتى قادام.
جاستار كوۆوركينگ ورتالىعى - جاستار مەن جاستار ۇيىمدارىنىڭ جۇمىسىن جۇزەگە اسىرۋعا مۇمكىندىك بەرەتىن ۇجىمدىق كەڭسە قىزمەتى. مۇندا الەۋمەتتىك جوبالار اياسىندا جاستار ءۇشىن بارلىق جاعداي جاسالعان. بيزنەس، شىعارماشىلىق، وقۋ باعدارلامالارى اياسىنداعى كرەاتيۆتى جوبالاردىڭ (قىزىعۋشىلىعى بويىنشا كلۋبتار، كورمەلەر، ۇيىرمەلەر، شەبەرلىك سىنىپتار، ترەنينگتەر، English club ت. ب.) جۇزەگە اسۋىنا ءتيىمدى ورتالىق بولىپ تابىلادى. ورتالىقتىڭ اشىلۋى قازاقستان جاستار كونگرەسىنىڭ 15 جىلدىعى اياسىندا وتكىزىلدى.
ونىڭ اشىلۋ سالتاناتىنا الماتى قالاسى اكىمىنىڭ ورىنباسارى - ا. و. قىرىقبايەۆ، قازاقستان جاستارى كونگرەسسىنىڭ اتقارۋشى ديرەكتورى - ا. م. ءسابيتوۆ، اۋەزوۆ اۋدانىنىڭ اكىمى - ا. ە. راقىمبەتوۆ، الماتى قالاسى جاستار ساياساتى ماسەلەلەرى جونىندەگى باسقارما باسشىسى - ە. س. بەيسەنبايەۆ، «Moskva Metropolitan» ساۋدا ورتالىعىنىڭ ديرەكتورى - ن. م. يبرايەۆ، ەسترادا جۇلدىزدارى، «بالەت باقىت» ءبي ءانسامبلى، «Funkytown» ءبي توبى، الماتى قالاسىنىڭ جاستار ۇيىمدارى، ج و و جاستار ءىسى جونىندەگى كوميتەت جەتەكشىلەرى، بەلسەندى قالا جاستارى، ستۋدەنتتەر مەن جاسوسپىرىمدەر قاتىستى.
