اسىل تۇقىمدى قوي وسىرمەك بولساڭىز الماتى وبلىسىنا كەلىڭىز
نەگىزگى باياندامانى قوي شارۋاشىلىعى بويىنشا رەسپۋبليكالىق پالاتانىڭ ءتوراعاسى تىنىشباي دوسىمبەك ۇلى جاسادى. دوسىمبەك ۇلىنىڭ ايتۋىنشا، پالاتا مۇشەلىگىندەگى عالىمدار بىرلەسىپ قوي شارۋاشىلىعىن دامىتۋدىڭ كەشەندى باعدارلاماسىن ازىرلەگەن.
وسى باعدارلامادا بەلگىلەنگەن ءبىرىنشى كەزەكتەگى ماسەلەلەر تۋرالى بايانداماشى كەڭىنەن اڭگىمەلەدى. پالاتا ءتوراعاسى ەڭ الدىمەن باسەكەگە قابىلەتتى بىرتەكتى تاۋار قالىپتاستىرۋ قاجەتتىگىن ايتتى. بۇل تاۋار حالىقارالىق ستاندارتتارعا جانە ەكسپورتتالاتىن ەلدىڭ ستاندارتىنا ساي بولۋى كەرەك.
بۇل ورايدا جوعارى ونىمدىلىگىن، ءوز قۇنىنىڭ تومەن بولۋىن، ءتيىستى تاۋارلىق كەلبەتى بولۋىن قامتاماسىز ەتۋ قاجەت. جۇمىستىڭ نەگىزگى مىندەتتەرىن ايقىنداعان بايانداماشى ولارعا قول جەتكىزۋ جولدارى، كورسەتىلەتىن مەملەكەتتىك قولداۋلار، قوي تۇقىمىن اسىلداندىرۋدىڭ ساتىلاي قادامدارى، ەكسپورتقا شىعارۋ جانە باسقا دا ماسەلەلەرگە توقتالدى. وسىنداي مازمۇنداعى بارلىق ماسەلەلەر بويىنشا رەسپۋبليكالىق پالاتا قوي وسىرۋشىلەرگە بارلىق قاجەتتى كومەكتى كورسەتپەك.
سەميناردا ۇلتتىق عىلىم اكادەمياسىنىڭ كوررەسپوندەنت مۇشەسى، اۋىل شارۋاشىلىعى عىلىمدارىنىڭ دوكتورى، پالاتالار كەڭەسىنىڭ مۇشەسى تولەۋحان سادىقۇلوۆ، اۋىل شارۋاشىلىعى عىلىمدارىنىڭ دوكتورى، پروفەسسور ماماي پرمانشايەۆ، «جەتىسۋ» ايماقتىق قاۋىمداستىعىنىڭ ءتوراعاسى كەڭەسحان ابدىلدەنوۆ قاتىسىپ، قوي شارۋاشىلىعىن دامىتۋدىڭ عىلىممەن بايلانىسىنىڭ ماڭىزى جايلى اڭگىمەلەدى.
وبلىستاعى شارۋا قوجالىقتارىنىڭ باسشىلارى، قوي وسىرۋشىلەر كەزدەسۋ بارىسىندا عالىمدار مەن ساراپشىلاردان ۇساق مال ءوسىرۋدىڭ زاماناۋي تاسىلدەرىن عانا ەستىپ قانا قويعان جوق، سونىمەن قاتار وزدەرىن تولعاندىراتىن ساۋالدارىنا تياناقتى جاۋاپ تا الدى. كەزدەسۋگە قاتىسۋشىلار مۇنداي كونسترۋكتيۆتى ديالوگ العا قويعان مىندەتتەردى ءتيىمدى شەشۋگە كومەكتەسەتىنىن، قوي وسىرۋدە ايتۋلى جەتىستىكتەرگە جەتۋ جولىندا وبلىس فەرمەرلەرى دە ءوز ۇلەستەرىن قوساتىندىعىن ايتتى.
اۆتور: سامال قابىشەۆا
