قازاقستان قۇراماسى اۆستريادا وتەتىن ارنايى وليمپيادا ويىندارىنا قاتىسادى
«6 سپورت تۇرىنەن جارىس جولىنا شىعاتىن 28 سپورتشىسى بار قازاقستاندىق قۇراما، سونىمەن بىرگە جەتەكشىلەر مەن جاتتىقتىرۋشىلار جانە تەحنيكالىق قىزمەتكەرلەر وسىناۋ دۇنيەجۇزىلىك ويىندارعا جانە جەڭىسكە جەتۋگە دايىن»، - دەلىنگەن كوماندانىڭ باسپا ءسوز قىزمەتى تاراتقان اقپاراتتا.
ارنايى وليمپيادا ويىندارى 18 -ناۋرىز كۇنى رەسمي تۇردە اشىلادى. 107 مەملەكەتتەن كەلگەن 2700 گە جۋىق سپورتشى مەن 1000 جاتتىقتىرۋشى شلادمينگ قالاسىنىڭ پلاناي ستاديونىندا وتەتىن اشىلۋ سالتاناتىنا قاتىسادى.
ايتا كەتەرلىگى، ءدال وسى ستاديوندا قىسقى سپورت تۇرلەرىنىڭ الەم كۋبوگىنىڭ كەزەڭدەرى وتەدى. ەستە بولسا، 2013 -جىلى FIS Alpine Ski World چەمپيوناتى دا وسى ستاديوندا وتكەن بولاتىن. دۇنيەجۇزىلىك ويىن 14 -ناۋرىز بەن 25 -ناۋرىز ارالىعىندا فلوربول، مانەرلەپ سىرعاناۋ، شورت-ترەك، كونكيمەن جۇگىرۋ، تاۋ شاڭعىسى سىندى 9 سپورت تۇرىنەن وتەدى. بارلىق جارىستاردى كورۋ تەگىن.
ايتا كەتەرلىگى، حالىقارالىق سپورت شاراسى اياسىندا ينكليۋزيۆتى ءبىلىم بەرۋ جانە سپورت ماسەلەلەرى جونىندەگى جاھاندىق فورۋم وتەدى. ونىڭ جۇمىسىنا قازاقستان اتىنان قر پارلامەنتى ءماجىلىسىنىڭ دەپۋتاتى ز. باليەۆا، «سپەشيال وليمپيكس قازاقستان» باس ديرەكتورى و. باحارايەۆا قاتىسادى.
«سپەشيال وليمپيكس» قازاقستان» ق ب (بۇدان ءارى - س و ق) رەسپۋبليكالىق قامقورشى سپورتتىق ۇيىم، ونىڭ نەگىزگى ماقساتى ينتەللەكتۋالدىق دامۋى بۇزىلعان ادامداردىڭ سپورتتىق ءىس- شارالارعا قاتىسۋىن قامتاماسىز ەتۋ ارقىلى ولاردىڭ قوعامنىڭ ناعىز مۇشەسى بولۋىنا كومەكتەسۋ بولىپ تابىلادى.
س و ق ميسسياسى ينتەللەكتۋالدىق دامۋى بۇزىلعان ادامدارعا ارنالعان كوپتەگەن وليمپيادالىق سپورت تۇرلەرىنەن جىل سايىنعى سپورتتىق جاتتىقتىرۋلاردى جانە جارىستاردى ۇيىمداستىرۋ، ولارعا دەنە شىنىقتىرۋ تۇرعىسىنان دامۋعا، ەرلىكتى كورسەتۋگە، وزدەرىن باقىتتى سەزىنۋگە مۇمكىندىك بەرۋ دەپ تابىلادى.
سپەشيال وليمپيكستىڭ فيلوسوفياسى ينتەللەكتۋالدىق دامۋى بۇزىلعان ادامدار دۇرىس جانە شىدامدىلىقپەن ۇيرەنگەندە دەنە شىنىقتىرۋ، الەۋمەتتىك جانە رۋحاني دامي الا الادى دەگەن سەنىمگە نەگىزدەلگەن.
دۇنيەجۇزىلىك ارنايى وليمپيادا ويىندارىندا كورسەتكەن جەتىستىكتەرى:
1991 -جازعى د ا و و. 3 مەدال: 1 كۇمىس، 2 قولا.
1993 -قىسقى د ا و و. 23 مەدال: 7 التىن، 10 كۇمىس، 6 قولا.
1995 -جازعى د ا و و. 70 مەدال: 22 التىن، 31 كۇمىس، 17 قولا.
1997 -قىسقى د ا و و. 34 مەدال: 22 التىن، 7 كۇمىس، 5 قولا.
1999 -جازعى د ا و و. 48 مەدال 18 التىن، 17 كۇمىس، 13 قولا.
2001 -قىسقى د ا و و. 16 مەدال: 7 التىن، 6 كۇمىس، 3 قولا.
2003 -جازعى د ا و و. 39 مەدال: 16 التىن، 14 كۇمىس، 9 قولا.
2005 - قىسقى د ا و و. 11 مەدال: 7 التىن، 3 كۇمىس، 1 قولا.
2007 - جازعى د ا و و. 49 مەدال: 24 التىن، 8 كۇمىس، 17 قولا.
2009 - قىسقى د ا و و. 41 مەدال: 21 التىن، 9 كۇمىس، 11 قولا.
2011 - جازعى د ا و و. 88 مەدال: 18 التىن، 37 كۇمىس، 33 قولا
اۆتور: مارلان جيەمباي
