قىتايلىق انشىلەر تاماعى اۋىرىپ قالعان ديماشقا قولداۋ كورسەتتى - فوتو، كەسكىن
بايقاۋدىڭ سەگىزىنشى كەزەڭى بۇگىن ەفيردەن كورسەتىلدى. وتانداسىمىز تاماعىنىڭ اۋىرعانىنا قاراماي ءساتتى ونەر كورسەتىپ، قىتايشا «تاڭ اتتى» انىمەن بەسىنشى ورىنعا تۇراقتادى.
ايتا كەتەرلىگى، دەمالىستىڭ ازدىعى سالدارىنان تۇماۋراتىپ تاماعى اۋىرىپ قالعان ديماشقا جوعارى دەڭگەيدە ورىنداۋدى تالاپ ەتەتىن «تاڭ اتتى» ءانىن ورىنداۋ وڭايعا سوقپاعان. جارىس جولىنان شىعىپ قالماۋ ءۇشىن ديماش تاماعىنا ەكى رەت اۋىرعاندى باساتىن ءدارى ەگىپ ساحناعا شىققان. ديماشتىڭ اۋىرعانىن ەستىگەن «تاڭ اتتى» ءانىنىڭ اۆتورى، قىتايدىڭ تانىمال ءانشىسى ءارى «Singer» بايقاۋى ءۇشىنشى ماۋسىمىنىڭ جەڭىمپازى حان حۋن ديماشقا حابارلاسىپ ءوز كەڭەستەرىن ايتقان.
ال جەتىنشى كەزەڭدە قاتارعا قوسىلعان قىتاي ەستراداسىنىڭ جۇلدىزى لي تسزيان ديماشقا باعالى ءدارى شوپتەن جاسالعان جوتەلگە جانە تاماقتىڭ اۋىرۋىنا قارسى ءدارىنى اكەلىپ بەرىپ، قولداۋ كورسەتتى. بارلىق قاتىسۋشىلار ديماشتىڭ تەز جازىلىپ كەتۋىنە تىلەكتەستىك ءبىلدىرىپ، قولداۋ كورسەتكەن. ديماش ءوز كەزەگىندە العىسىن ايتىپ، وسى قولداۋدىڭ ارقاسىندا قيىندىقتاردى جەڭگەنىن جەتكىزدى.
ەسكە سالا كەتەيىك، ديماش جەتىنشى كەزەڭدە «دايديداۋ» انىمەن ءۇشىنشى، سەگىزىنشى كەزەڭدە قىتايشا «تاڭ اتتى» انىمەن بەسىنشى ورىن يەلەنىپ، ءتورتىنشى اينالىمنىڭ قورتىندىسى بويىنشا بەسىنشى بولىپ كەلەسى كەزەڭگە وتكەن. توعىزىنشى كەزەڭدە وتانداسىمىز اعىلشىنشا «All by Myself» ءانىن شىرقاپ ەكىنشى ورىننان كورىندى.
اۆتور: مۇحتار قاليموللا ۇلى
