ب ا ق: گولوۆكين ۋاقىت وتكەن سايىن كۇشەيىپ كەلەدى

استانا. قازاقپارات - بريتانيالىق The Mirror باسىلىمى گەننادي گولوۆكين (36-0, 33 ك و) مەن دەنيەل دجەيكوبستىڭ (32-1, 29 ك و) كەزدەسۋىنە قاتىستى پىكىردى جاريا ەتتى، دەپ جازادى Sports.kz.

«قازىر گولوۆكين 34 جاستا. الايدا ول ۋاقىت وتكەن سايىن كۇشەيىپ كەلە جاتقان سياقتى اسەر قالدىرادى. ول گينەستىڭ رەكوردتار كىتابىن جاڭارتاتىن سياقتى. وعان ەشكىم دە قارسى كەلە الماي وتىر. الۆارەستىڭ ءوزى گەنامەن كەزدەسۋدەن باس تارتۋ ءۇشىن كەز كەلگەن نارسەنى سىلتاۋ ەتەدى. سوندىقتان دا ءبىز قازاقستاندىق بوكسشىمەن قولعا تۇيىستىرۋگە كەلىسىپ وتىرعان دەنيەل دجەيكوبستى مويىنداۋىمىز كەرەك. سىزدەردىڭ بارلىقتارىڭىز دا كارلوس مونسون، مارۆين حاگلەر، دجەيمس توني بولعاندا گولوۆيننىڭ تۇگىن قالدىرمايتىن ەدى دەگەن سياقتى پىكىرلەردى ەستىپ جۇرسىزدەر. بۇل وتە كۇلكىلى جاعداي. ويتكەنى گولوۆكين ولاردىڭ بارلىعىن دا تىزە بۇكتىرەر ەدى. ءتىپتى ودان كوپكە بارۋى مۇمكىن»، - دەپ جازادى The Mirror ءتىلشىسى بارري ماكگيگان.