قازاقستاندىقتاردىڭ ديماشقا بەرگەن داۋىستارى ونىڭ بايقاۋداعى رەيتينگىنە اسەر ەتەتىنى راس پا - فوتو
اتاپ ايتقاندا، Whatsapp جەلىسىندە «ديماشقا داۋىس بەرۋ باستالدى، مىنا قىتاي جازۋىن باسساڭىز، ديماشتىڭ فوتوسى 1- بولىپ تۇر. قىزعىلت سارىنى باسقاندا، ول قوڭىرعا اينالۋى كەرەك. داۋىس بەرۋ بۇگىن، قازىر باستالدى. ءبىزدىڭ بالا ازىرگە ءبىرىنشى بولىپ كەلەدى. اللاعا امانات! بارلىعىنا وسىنى تەزدەتىپ سالارسىزدار! العا، قازاقستان!!!»، - دەگەن حابارلاما تاراتىلۋدا.
سونداي-اق، Facebook الەۋمەتتىك جەلىسىندە ديماش قۇدايبەرگەن ءۇشىن داۋىس بەرۋدى سۇراپ، مەملەكەتتىك قىزمەتكەرلەرىمىز دە پوستتار جازۋدا. «ديماش قۇدايبەرگەنوۆ ءۇشىن داۋىس بەرۋىڭىزدى وتىنەمىن. ول داۋىستار بويىنشا ءبىرىنشى بولىپ كەلە جاتىر، دايديداۋ ولەڭى. قىزعىلت سارى تەتىكتى باسۋ قاجەت. ءبىزدىڭ جۇلدىزىمىزدى قولدايىق. رەپوست قۇپتالادى!»، - دەپ جازعان ولار، قىتايلىق سايتتىڭ سىلتەمەسىمەن بولىسكەن.
سىلتەمەنى باسىپ كورگەن قازاقپارات ءتىلشىسى ماسەلەنىڭ جاي-جاپسارىن تۇسىنۋگە تىرىسقان بولاتىن. شىندىعىندا، قازاقستاندىقتاردان سۇرالىپ وتىرعان داۋىس بەرۋ «Singer 2017» بايقاۋىنىڭ 7-كەزەڭ قاتىسۋشىلارىنا ارنالعان ساۋالناما.
ونى اتالمىش بايقاۋدى تىكەلەي جانە ينتەرنەتتە كورسەتۋگە رۇقساتى بار ءۇش ۆيدەو- حوستينگتىڭ ءبىرى - قىتايلىق 爱奇艺 (iqiyi.com) ورنالاستىرعان بولىپ شىقتى. بۇل ساۋالناما ونەرپازداردىڭ بايقاۋداعى ۇپايلارىنا ەش اسەر ەتپەيدى.
ءبىراق، ايتا كەتەيىك، جانكۇيەرلەردىڭ قولداۋىمەن ديماش اتالمىش ۆيدەو-حوستينگتە 530 مىڭ داۋىس جيناپ، ءبىرىنشى ورىندا تۇر. جوبانىڭ باعالاۋ تالاپتارىنا سايكەس، قاتىسۋشىنىڭ تاعدىرىن ءتۇسىرىلىم بارىسىندا زالدا وتىرعان 500 تىڭدارمان شەشەدى. ولار داۋىس بەرۋ ارقىلى سول كەزەڭدەگى ەڭ ۇزدىك ءانشىنى تاڭداپ، ەڭ از ۇپاي جيناعان ءبىر قاتىسۋشىنى بايقاۋدان شىعارىپ وتىرادى. ءار اينالىمنىڭ قورىتىندىسى بويىنشا، 1-ورىننان 7-ورىنعا دەيىن رەيتينگ قۇرىلىپ، جوبادان شىعىپ قالعان 7-ورىنداعى ءانشىنىڭ ورنىنا جاڭا ءانشى قوسىلادى.
ايتا كەتەيىك، «Singer 2017» بايقاۋىنىڭ جەتىنشى كەزەڭى 4 -ناۋرىز كۇنى ەفيردە كورسەتىلدى. ديماش قازاقتىڭ «دايديداۋ» ءانىن ورىنداپ، ءۇشىنشى ورىن العانى تۋرالى حابارلاعان ەدىك.
ونىڭ قىتايشا «تاڭ اتتى» ءانىن ورىنداعان سەگىزىنشى كەزەڭ - 11 -ناۋرىزدا، الەمدىك حيت «All by Myself» - تى ورىنداعان توعىزىنشى كەزەڭ 18 -ناۋرىزدا كورسەتىلەدى.
ەسكە سالا كەتەيىك، ديماش قۇدايبەرگەن بايقاۋدىڭ توعىز كەزەڭىندە ونەر كورسەتىپ ۇلگەردى. فينالعا تەك ءبىر كەزەڭ قالدى.
اۆتور: مۇحتار قاليموللا ۇلى
