مينيستر دۇيسەنوۆا اكىمدەر رەيتينگىندە جۇمىسسىزدىق دەڭگەيى ەسكەرىلەتىنىن ەسكە سالدى - فوتو
اقتوبە وبلىسىندا جۇمىسسىزدىق 4,8 پايىز دەڭگەيىندە ساقتالىپ تۇر. ەسەپ بويىنشا 73 مىڭ ادام ءوز-ءوزىن جۇمىسپەن قامتاماسىز ەتىپ وتىر. ونىڭ 50 مىڭى ناتيجەلى جۇمىسپەن اينالىسادى. ال 20 مىڭ ادام جۇمىسسىز.
«وتكەن جىلى جۇمىسپەن قامتۋ باعدارلاماسىنا ساي 16 مىڭنان استام ادام تۇراقتى جۇمىسقا ورنالاستى. بۇل ماقساتقا 9 ميلليارد تەڭگەدەن استام قارجى ءبولىنىپ، اقشانىڭ 98 پايىزى يگەرىلدى. ال مۇمكىندىگى شەكتەۋلى ازاماتتارعا 2 ميلليارد تەڭگە قاراستىرىلدى. تالاپقا ساي جۇمىس بەرۋشى مۇگەدەكتەردى جۇمىسقا ورنالاستىرۋ كەرەك. 3 پايىزدىق كۆوتا دا بار. ءبىراق وسى جاعى اقساپ تۇر»، - دەدى وبلىس اكىمى بەردىبەك ساپاربايەۆ.
بيىل ەلىمىزدە «ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى ىسكە اسىرالادى. اقتوبەگە جۇمىس ساپارىمەن كەلگەن ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا اۋدان، اۋىل اكىمدەرىنە رەيتينگتىڭ ءبىر ءبولىمى حالىقتى جۇمىسپەن قامتۋمەن ولشەنەتىنىن ەسكە سالدى.
«اكىمدەردىڭ رەيتينگى حالىقتى جۇمىسقا ورنالاستىرۋمەن بەلگىلى بولادى. سوندىقتان جاڭا باعدارلامانى ىسكە اسىرۋدا تەحنيكالىق ءبىلىم بەرۋ، قىسقا مەرزىمدى كۋرستاردا وقىتىپ، ءبىلىم العانداردى جۇمىسقا ورنالاستىرۋ ءىسى كەشەندى جۇرگىزىلۋ كەرەك. اكىمدەر اۋىلعا قاجەتتى ماماندىقتى تاعى ءبىر قاراپ، ناقتى جۇمىس ورنى اشىلاتىن، قىزمەت ورنى بوسايتىن ماماندىققا جۇمىسسىزدى وقىتۋى قاجەت. وقۋ ارنايى كوللەدجدەردە، ءتىپتى مەكتەپتەردىڭ بازاسىندا دا وتكىزىلەدى. ماسەلەن، كومپيۋتەر ۇيرەنۋ كەرەك بولسا، وعان مەكتەپتىڭ ارنايى كلاسىن پايدالانۋعا بولادى»، - دەدى مينيستر ت. دۇيسەنوۆا.
ايتا كەتەيىك، «ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسىن ىسكە اسىرۋ ءۇشىن اقتوبەگە 5 ميلليارد تەڭگەگە جۋىق قارجى ءبولىندى. ونىڭ ىشىندە 1 مىڭنان استام ادامدى تەحنيكالىق ماماندىقتارعا وقىتۋ ءۇشىن 255 ميلليون تەڭگەدەن استام قارجى قاراستىلعان. ال قىسقا مەرزىمدى كۋرستار ارقىلى 757 ادام وقىتىلادى. بۇل ماقساتقا 189 ميلليون تەڭگە ءبولىندى. قازىرگى ۋاقىتتا وبلىستىق ءبىلىم باسقارماسى مەن سالالىق باسقارمالار بىرلەسە، الداعى 3 جىلدا وڭىرگە 8 مىڭعا جۋىق مامان قاجەت ەكەنىن انىقتادى. سول سۇرانىسقا ساي تاس جول توسەيتىن كولىك جۇرگىزۋشىسى، ليفت جوندەۋشىلەر مەن باعباندار دايىندالادى.
اۆتور: التىناي ساعىندىقوۆا
