ءابىش كەكىلبايەۆتىڭ ايتقاندارى
ءابىشتى ابىز دەپ اتاساق تا ءسوزىمىز ارتىق بولمايدى. ونىڭ «اڭىزدىڭ اقىرى»، «ۇركەر»، «ەلەڭ-الاڭ» تاريحي روماندارى - تەك تاريحي شەجىرە ەمەس، بۇگىنگى قوعام ۇردىسىمەن، ۇلت مۇددەسىمەن استاسىپ، بوستاندىق رۋحى مەن وركەنيەتتىڭ وشپەس قۇندىلىقتارىنا ۇمتىلاتىن مىنەز تاربيەلەرلىك قۋاتتى شىعارمالار.
ءابىش كەكىلبايەۆتىڭ قاي قاسيەتىن ءسوز ەتسەك تە، ەڭ الدىمەن، قازاق ساناسىندا ونىڭ ادەبيەت سىنشىسى، شەبەر، كوركەم شىعارما جازۋشىلىعى العى كەزەككە شىعادى. ادەبيەتكە بالا كەزىنەن مول دايىندىقپەن كەلگەنى ونىڭ تەرەڭ شىعارمالارىنان ايقىن كورىنەدى.
نە جازسا دا ۇلتتىق سانانى سىڭىرگەن بىلگەن جازۋشىنى ءالى وقىپ، ءتۇپسىز تەرەڭ الەمىنە ەنگەن ەشكىم جوق شىعار.
ءابىشتىڭ ايتقاندارىن وقي وتىرايىق!
***
باعالاي بىلمەگەنگە باق قونبايدى، قۋانا بىلمەگەنگە قۇت قونبايدى.
***
ۋاقىتتىڭ وتەتىنى راس، كوپ نارسەنىڭ ۇمىتىلاتىنى راس. ءبىراق ءومىر ءبىراق رەت بەرىلەدى دەگەن ءوزىمىز بىلەتىن قاعيدا بار. ول قانداي زاماندا، قانداي جاعدايدا وتسە دە ءبارىبىر قىمبات. سوندىقتان ءوز باسىم وتكەنگە وكپە جۇرمەيدى دەپ ويلايمىن. وتكەنگە تەك تاۋبە جۇرەدى دەپ ويلايمىن.
***
ونەردە شاكىرتتىك سەزىمىن جوعالتقان ادام ۇستاز بولا المايدى.
***
اككىلىك جۇرگەن جەردە شىن ءپاتۋانىڭ، اۋلەكىلىك جۇرگەن جەردە شىن پاراساتتىڭ كوسەگەسى كوگەرە قويۋى نەعايبىل.
***
ادامدى ادام ەتكەن - كىتاپ، ادامزات ەتكەن - كىتاپحانا.
***
مەرگەندەردىڭ جاقىن جۇرگەنىنەن الىس جۇرگەنى قاۋىپتى، مەرگەن ەمەستەردىڭ الىس جۇرگەنىنەن جاقىن جۇرگەنى قاۋىپتى.
***
ۇلت انالار بەرگەن اق سۇتتەن ءنار الىپ، اكەلەر كورسەتكەن اتا جولمەن وركەندەيدى.
***
كىتاپ پەن كىتاپحانا بار جەردە ۇرپاقتار اراسىندا جالعاسىپ جاتقان ينتەللەكتۋلدىق ۇلى سەرپىن ەشقاشان توقتامايدى.
***
كىشكەنتاي كوزدەرگە جاقسىلىق ىستە مەيلىڭ، جاماندىق ىستە مەيلىڭ، جانارىنىڭ شاراسىنا سىيمايتىنداي الاپات قىپ ىستە. ايتپەسە، از جاقسىلىعىڭا ءبارىبىر مىسە تۇتپايدى، ال ءسال عانا جاماندىعىڭدى كورسە - جەردەن الىپ، جەرگە سالىپ جازعىرا جونەلەدى.
***
دۇنيەدە ادام ءۇشىن جالعىزدىقتان اسقان ازاپ جوق.
***
دۇنيەدەگى ەڭ قاتەرلى كەساپات-ۇيرەنشىكتى داعدىنىڭ دەگەنىنەن اسا الماۋ.
***
بەتىنە قۇمىرسقا جورعالاسا دا ءىز تۇسەتىن ۇپ-ۇلپا ماي توپىراق بولادى-اۋ. ايەلدىڭ جانى دا تاپ سونداي. وعان ايتىلعان ناز، سالعان قولقانىڭ ەشبىرى ءىز-ءتۇسسىز قالمايدى.
***
ادام الدانا بىلمەسە، كەپ-كەلتە عۇمىرىندا باسىنان كەشىرەتىن سان-ساپات تاۋقىمەت پەن ازاپقا ءبىر كۇن دە توزە الماس ەدى. كوڭىلدىڭ قورعانىشى - الدانىش.
massaget.kz
