بالعىنبەك يماشەۆ: ايەلىمدى قاتتى قىزعانامىن. توركىنىنە دە مەنسىز بارمايدى

استانا. قازاقپارات - بالعىنبەك يماشەۆ جۇبايىن قاتتى قىزعاناتىنىن ايتتى. ءتىپتى، ونى توركىنىنە جالعىز جىبەرمەيدى ەكەن.

بۇل تۋرالى «ايەل باقىتى» باعدارلاماسىندا ايتىلدى.

قىزعانشاقتىقتىڭ ادام دەنساۋلىعىنا كەرى اسەرىن تيگىزەتىنىن اعىلشىن عالىمدارى دالەلدەپ وتىر.

ماسەلەن، شەكتەن تىس قىزعانشاق جانداردا باس اۋرۋى، اسقازان اۋرۋى جانە دە ۇيقىسىزدىق ءجيى مازالايدى ەكەن. ال نەمىس عالىمدارى جەر بەتىندەگى حالىقتىڭ ℅95 ىندا قىزعانىش سەزىمىنىڭ بار ەكەنىن ايتىپ وتىر. وسى ورايدا، ايتىسكەر اقىن بالعىنبەك يماشەۆ ءوزىن وسى كوپتىڭ قاتارىنا جاتقىزاتىنىن ايتىپ ءوتتى.

«ءسوز جوق، قىزعانشاقپىن. وتە قىزعانشاقپىن. ءبىراق تۋعان-تۋىسقاندارىنا جىبەرىپ تۇرامىن. جۇبايىم سىرتقا كوپ شىعا بەرمەيدى. ءوزى 10 بالانىڭ اراسىندا وسكەن، اناسىنىڭ دا بەرگەن تاربيەسى وتە جاقسى. توركىنىنە جىبەرسەم، «اكەم-شەشەم ماعان كۇيەۋىڭسىز كەلمە دەپ ايتقان» دەپ جالعىز بارمايدى. سول سەبەپتى ەكەۋىمىز بىرگە بارامىز»، - دەيدى بالعىنبەك يماشەۆ.

ال پسيحولوگ ۆەنەرا تەلجان ءوز كەزەگىندە قىزعانىشقا بوي الدىرماۋعا كەڭەس بەردى. مۇنىمەن قاتار، ايەلدەردىڭ ەرلەرگە قالاي دۇرىس قىزمەت قىلۋ كەرەكتىگى تۋرالى ايتىپ ءوتتى.

«قازىرگى تۇرمىس قۇرىپ جاتقان جاستاردا سابىر جوق. ءبىر-ءبىرىن تۇسىنىسۋگە تىرىسپايدى. ويتكەنى ادام سابىرلى بولۋى ءۇشىن ونىڭ دەنەسى، سانا-سەزىمى، تۇلعاسىنىڭ بارلىعى دۇرىس بولۋى ءتيىس. ادام كۇندەلىكتى ومىردە پسيحو-ەموتسيونالدىق قيىندىقتار كورەدى. ونى ارتىنشا وتباسىنا الىپ كەلەدى. وتىرىپ الىپ وسىنىڭ بارلىعىن كۇيەۋىنە جىبەرەدى.

ايەلدەرگە «سىزدەر كۇيەۋلەرىڭىزگە قىزمەت جاساڭىزدار، سىيلاڭىزدار» دەپ ايتىپ وتىرامىن. ولار ءوز كەزەگىندە جولداستارىنىڭ ەركەلەپ، قۇتىرىپ كەتكەنىن ايتادى.

وسى تۇستا قىزمەت قىلۋ مەن ءوزىڭدى تومەندەتۋدىڭ اراسىن دۇرىس اجىراتىپ الۋ كەرەك. ونىڭ بارلىعى اينالىپ كەلىپ قايتادان ءوزىنىڭ ەموتسياسىنا اسەر ەتەدى. قايتادان قىزعانا باستايدى»، - دەيدى مامان.