ناۋرىز مەيرامىندا الماتىداعى اتلەتتەر قالاشىعى قازاق اۋىلىنا اينالادى

الماتى. قازاقپارات - الماتىدا ناۋرىز مەيرامى قالا اكىمدىگىنىڭ ۇيىمداستىرۋىمەن «استانا» الاڭى مەن اتلەتيكالىق اۋىلدا تويلانباق، دەپ حابارلايدى قازاقپارات ءتىلشىسى.

قالا اكىمدىگىنەن حابارلاعانداي، 22- ناۋرىز كۇنى «استانا» الاڭىنا كيىز ۇيلەر تىگىلىپ، ناۋرىز تاقىرىبىنا ارنالعان ينستاللياتسيالار ورناتىلادى.

«مەرەكەدە «مۇشەل» اتتى تەاترلاندىرىلعان كورىنىس كورسەتىلىپ، قازاقتىڭ كونەدەن كەلە جاتقان سالت-داستۇرىندەگى «سامالىق»، «تۇلىك جىرى» سياقتى ءان-جىرلار ورىندالادى.

مەرەكەلىك قويىلىم وتەتىن الاڭ ءبىرتۇتاس ساحنالىق كەڭىستىك پرينتسيپىمەن بەزەندىرىلەدى. بارلىق مەرەكەلىك ءىس-شارالار، ءان-ءبي، تەاترلاندىرىلعان قويىلىم ق ب ت ۋ عيماراتىنىڭ الدىنا جينالعان جۇرتشىلىقتىڭ بارلىعى بىردەي كورە الاتىن ساحنادا وتەدى»، - دەلىنگەن قالالىق اكىمدىكتىڭ حابارلاماسىندا.

ال اتلەتتەر قالاشىعىنداعى مەرەكەلىك قويىلىم وتەتىن الاڭ تۇتاستاي جاڭا قونىسقا قونعان قازاق اۋىلىن ەلەستەتەدى. الاڭنىڭ كىرەبەرىسىنە ەجەلگى ۇلگىدەگى قاقپا ورناتىلىپ، ونىڭ ەكى جاق شەتىنە كونە كۇيمە ۇستىنە تىگىلگەن 2 كيىز ءۇي قويىلادى.

مەرەكە وتەتىن الاڭعا «شامدال»، «قوس»، «كونە ساۋدا اربالارى»، «تاڭبالى تاستار»، «تاريح تەگەرشىگى» اتتى ينستاللياتسيالار جانە ۇلتتىق نىشانداعى ءارتۇرلى مۇسىندەر قويىلادى.

 ۇلىستىڭ ۇلى كۇنى مەرەكەسىندە رامازان ستامعازيەۆ، نۇرجان جانپەيىسوۆ، تىلەۋلەس قۇرمانعاليەۆ، ەركىن شۇكىمان، ايگۇل قوسانوۆا سىندى قازاقتىڭ ايتۋلى انشىلەرى، ن. تىلەنديەۆ اتىنداعى «وتىرار سازى» فولكلورلىق-ەتنوگرافيالىق وركەسترى، «قوڭىر»، «مۋزارت»، «الاش ۇلى» توپتارى، ايقىن، ءالي وقاپوۆ، ءمولدىر اۋەلبەكوۆا، مارجان اراپبايەۆا سياقتى تانىمال ەسترادا جۇلدىزدارى ونەر كورسەتەدى.

اۆتور: الماس مۇقاش ۇلى