قازاقستاندىق بالۋاندار «ۇلكەن دۋلىعانىڭ» العاشقى كۇنىن جۇلدەسىز باستادى

استانا. قازاقپارات - ازەربايجان استاناسى باكۋ قالاسىندا دزيۋدودان«ۇلكەن دۋلىعا»  تۋرنيرىنىڭ العاشقى كۇنى اياقتالدى، دەپ حابارلايدى قازاقپارات ءتىلشىسى.

بۇل كۇنى تاتاميگە قازاقستاننان 7 دزيۋدوشى شىقتى. ىرىكتەۋ كەزەڭىندە بەسەۋى سۇرىنسە، قالعان ەكەۋى جارىستى بەسىنشى ورىنمەن اياقتادى.

ولار - عۇسمان قىرعىزبايەۆ (60 كەلى) مەن سيەۆارا نىشانبايەۆا (57 كەلى) . عۇسمان قىرعىزبايەۆ العاشقى اينالىمدا ۆەنگريالىق سزابو شابۋدى يپپونمەن ۇتىپ، ەكىنشى بەلدەسۋىن ازەربايجان سپورتشىسى ورحان سافاروۆقا قارسى وتكىزدى.

سافاروۆپەن وتكەن بەلدەسۋ وتە تارتىسى دەسە دە بولادى. نەگىزگى ۋاقىتتا تەڭ تۇسكەن بالۋاندار شىن مىقتىنى گولدەن سكوردا (قوسىمشا ۋاقىتتا) انىقتادى. گولدەن سكوردا ازەربايجاندىق ورحان سافاروۆ سىلبىر كۇرەسكەنى ءۇشىن ءۇشىنشى شيدوسىن الىپ، جارىستان شىقتى دا، عۇسمان قىرعىزبايەۆ جارتىلاي فينالعا جولداما الدى.

جارتىلاي فينالدا جاپون دزيۋدوشىسى شيشيمە تورۋمەن كەزدەسىپ، بەلدەسۋ بارىسىندا وتانداسىمىز تاتاميگە باسىمەن تۇسكەندىكتەن (ەرەجەگە سايكەس، مۇنداي جاعدايدا دزيۋدوشىنىڭ موينى/جەلكەسى/باسىنا زاقىم كەلمەس ءۇشىن جارىستان شىعارادى) جارىستى توقتاتىپ، جەڭىس شيشيمە تورۋعا بەرىلدى.

ناتيجەسىندە، عۇسمان قىرعىزبايەۆ جۇبانىش بەلدەسۋدە قولا مەدال ءۇشىن كۇرەسكە شىقتى. وندا ول يانيسلاۆ گەرچيەۆتەن (بولگاريا) جەڭىلىپ، جارىستى بەسىنشى ورىنمەن اياقتادى.

57 كەلىدە سىنعا تۇسكەن قازاقستاندىق سيەۆارا نىشانبايەۆا جارىستى ەكىنشى بەلدەسۋدەن باستادى. ول لەيلا ءشاحيندى (ازەربايجان) يپپونمەن ۇتىپ، جارتىلاي فينالدا تايپەي قىزى ليەن چەن- ليننان جەڭىلىس تاپتى. جۇبانىش بەلدەسۋىندە «قولاعا» كۇرەسۋگە مۇمكىندىك الدى. ءبىراق نەلسون ليەۆي تيمنامەن (يزرايل) بەلدەسكەن سيەۆارا نىشانبايەۆا جەڭىلىسكە ۇشىرادى.

ناتيجەسىندە، وتانداسىمىز «ۇلكەن دۋلىعا» تۋرنيرىندە بەسىنشى ورىنعا جايعاستى.

الەمنىڭ 31 ەلىنەن 183 سپورتشى قاتىساتىن بۇل دودادا قازاقستان ۇلتتىق قۇراماسىنان 14 دزيۋدوشى ەل نامىسىن قورعايدى.

اۆتور: كۇنسۇلتان وتارباي