وڭتۇستىكتە مەنى «ورىس» دەپ اتايدى - جەمقورلىققا قارسى دەپارتامەنت باسشىسى كومەكبايەۆ

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ وڭتۇستىك قازاقستان وبلىسى بويىنشا دەپارتامەنت باسشىسى ءالي كومەكبايەۆ «وڭتۇستىكتىڭ حالقى ءبىر- بىرىنە اقشا بەرىپ ۇيرەنگەن» دەگەن ءسوزدى ەستىگەن. الايدا ءوزى وندايعا جول بەرمەۋگە تىرىسادى. سول سەبەپتى ونى «ورىس» دەپ اتايدى،

 دەپ حابارلايدى قازاقپارات ءتىلشىسى.

 «مەنىڭ تۋىپ وسكەن جەرىم - وڭتۇستىك قازاقستان وبلىسى. قارا شاڭىراق سوندا. ءبىراق 18 جىل بويى مەن وسىندا - استانادا جۇمىس جاسادىم. ەندى، وڭتۇستىككە قىزمەت بابىمەن بارىپ وتىرمىن. ءيا، «وڭتۇستىكتىڭ حالقى ءبىر- بىرىنە اقشا بەرىپ ۇيرەنگەن، ءسويتىپ ءبىر- ءبىرىن بايىتادى» دەگەندى مەن دە ەستىگەنمىن. ءبىراق ءوزىم ونى كورمەيمىن. جوق دەپ، تاعى ايتا المايمىن. دەگەنمەن، «ونداي جۇيە قالىپتاسىپ كەتكەن» دەگەن سوزبەن كەلىسپەيمىن. ماعان دا ءتۇرلى اڭگىمەلەر تۇسەدى. ول جاقتا مەنى «ورىس» دەپ ايتادى دا. ويتكەنى ونداي قارىم- قاتىناسقا جولامايمىن. ويتكەنى مەن تاربيەمدى وسى اگەنتتىكتە الدىم. وسى ورتالىق اپپاراتتا تاربيەمدى الىپ باردىم. ماعان ادام كەلەدى، كومەكتەسشى دەپ سۇرايدى. مەن وعان سايتتى كورسەتەم دە، ىشىندە دايىندىق تەستەرى بار دەيمىن. سولاي دايىندال دەيمىن»، - دەدى كومەكبايەۆ بۇگىن استانادا وتكەن باسپا ءسوز ءماسليحاتىندا.

 ونىڭ ايتۋىنشا، وڭتۇستىك وڭىردە بىرگە وقىعان جانە بىرگە جۇمىس ىستەگەن قاتارلاستارى كوپ. كەيبىر ادامدار سولار ارقىلى تانىس- تامىرلاستىق ىزدەيدى ەكەن. الايدا دوستارى قولىن ءبىر سىلتەپ: «ودان ناتيجە شىقپايدى. ول «ورىس» بولىپ كەتكەن»، - دەپ جاۋاپ قايتاراتىن كورىنەدى.

ايتا كەتەيىك، بۇگىن ەلوردادا وتكەن باسپا ءسوز ءماسليحاتىندا ءا. كومەكبايەۆ memkyzmet.kz اتتى قوسىمشا سايتتىڭ تانىستىرىلىمىن وتكىزدى. اتالعان پورتالدا مەملەكەتتىك قىزمەتكەرلەر عانا ەمەس، مەملەكەتتىك قىزمەتكە جۇگىنەتىن قاراپايىم ازاماتتار دا قاجەتتى اقپاراتتى الا الادى. سونىڭ ارقاسىندا جەمقورلىق ارەكەتتەردىڭ الدىن الۋعا مۇمكىندىك بار. بۇدان بولەك، دەپارتامەنت باسشىلىعى مەكتەپ ديرەكتورلارىن تاعايىنداۋ بويىنشا وبلىس اكىمىنە ءتيىستى ۇسىنىستارىن ەنگىزۋدى كوزدەيدى.

 اۆتور: ارمان اسقاروۆ