الماتىدا ناۋرىز مەرەكەسى استانا الاڭى مەن اتلەتيكالىق اۋىلدا تويلانادى
استانا الاڭىنا كيىز ۇيلەر، ءار ءتۇرلى قوستار، شاتىرلار تىگىلىپ، ناۋرىز مەرەكەسىنە ساي ينستاللياتسيالار ورناتىلماق. مەيرامدا «مۇشەل» دەگەن تاقىرىپپەن تەاترلاندىرىلعان كورىنىس كورسەتىلىپ، قازاقتىڭ كونەدەن كەلە جاتقان سالتتارى، جىر ايتۋ داستۇرلەرى - «سامالىق»، «تۇلىك جىرى» اندەرى ورىندالادى.
قالا اكىمدىگى باسپا ءسوز قىزمەتىنىڭ مالىمەتىنە سۇيەنسەك، مەرەكەلىك قويىلىم وتەتىن الاڭ تۇتاستاي بەزەندىرىلەدى. ۇلكەن ساحنادان ءماندى دە كوڭىلدى شارالاردى، ءان- بي مەن تەاترلاندىرىلعان قويىلىمدى جينالعان جۇرتشىلىقتىڭ ءبارى كورە الادى.
ال اتلەتيكالىق اۋىلداعى مەرەكەلىك قويىلىم جاڭا قونىستاعى قازاق اۋىلىن ەلەستەتەدى. الاڭنىڭ كىرەبەرىسىنە ەجەلگى ۇلگىدەگى قاقپا ورناتىلىپ، ونىڭ ەكى جاق شەتىنە كونە كۇيمە ۇستىنە تىگىلگەن ەكى كيىز ءۇي قويىلادى. مەرەكە وتەتىن الاڭعا «شامدال»، «قوس»، «كونە ساۋدا اربالارى»، «تاڭبالى تاستار»، «تاريح تەگەرشىگى» اتتى ينستاللياتسيالار جانە ۇلتتىق نىشانداعى ءار ءتۇرلى مۇسىندەر قويىلادى.
ۇلىستىڭ ۇلى كۇنى مەرەكەسىندە رامازان ستامعازييەۆ، نۇرجان جانپەيىسوۆ، تىلەۋلەس قۇرمانعاليەۆ، ەركىن شۇكىمان، ايگۇل قوسانوۆا سىندى قازاقتىڭ ايتۋلى انشىلەرى، ن. تىلەنديەۆ اتىنداعى «وتىرار سازى» فولكلورلىق- ەتنوگرافيالىق وركەسترى، «قوڭىر»، «مۋزارت»، «الاش ۇلى» توپتارى، ايقىن، ءالي وقاپوۆ، ءمولدىر اۋەلبەكوۆا، مارجان اراپبايەۆا سياقتى تانىمال ەسترادا جۇلدىزدارى ونەر كورسەتەدى.
اۆتور: الماس مۇقاش ۇلى
