ساتىبالدى نارىمبەتوۆتىڭ «كوزىمنىڭ قاراسى» اتتى كىتابىنىڭ تۇساۋكەسەرى ءوتتى
قوعام جانە ونەر قايراتكەرلەرى قاتىسقان كەشتى «كوزىمنىڭ قاراسى» مادەني- تانىمدىق كلۋبى جانە ش. ايمانوۆ اتىنداعى «قازاقفيلم» كينوستۋدياسى ۇيىمداستىرعان.
كينوستۋديانىڭ باسپا ءسوز قىزمەتىنىڭ حابارلاۋىنشا، سۋرەتكەر تەك كينو سالاسىندا عانا ەمەس، سونىمەن قاتار، كوركەم پروزا جانرىندا دا ءونىمدى ەڭبەك ەتىپ كەلەدى. 1968 -جىلى «تەنتەك» اتتى كىتابى، 1981 -جىلى «اسسالاۋماعالەيكۋم، اتلانتيدا!» اتتى پوۆەست، اڭگىمەلەر جيناعى جارىق كورگەن. ال «كوزىمنىڭ قاراسى» كىتابى س. نارىمبەتوۆتىڭ اۆتورلىق الەمىن تەرەڭىرەك اشا تۇسەتىن تۋىندى. وندا كينورەجيسسەرلىك، جازۋشىلىق قاسيەت بويىنان ۇيلەسىم تاپقان تۇلعانىڭ ءومىر سوقپاعى، ونەرىنىڭ سىرى، ازاماتتىق بولمىسى، ارىپتەستەرى تۋرالى، قوعام مەن رۋحانيات جايلى تولعامدارى، ەسسەلەرى مەن ەستەلىكتەرى، سونداي- اق ارىپتەستەرىنىڭ اۆتور تۋرالى ويلارى دا قامتىلعان. بۇدان بولەك، كىتاپقا رەجيسسەردىڭ كينوسسەناريلەرى دە ەنگىزىلىپ وتىر. قازاق كينوسىنىڭ الەمدىك كونتەكستەگى ورنىن انىقتاۋعا مۇمكىندىك بەرەتىن، ءۇش بولىمنەن تۇراتىن جيناق ۇلتتىق مادەنيەتىمىزدى تاعى ءبىر قىرىنان ايشىقتايدى.
ايتا كەتەيىك، ساتىبالدى نارىمبەتوۆ - بەلگىلى كينورەجيسسەر، كينوسسەنارييشى، جازۋشى، ق ر ەڭبەك سىڭىرگەن قايراتكەرى، ق ر مەملەكەتتىك سىيلىعىنىڭ يەگەرى، تاۋەلسىز «تارلان» جانە فرانسۋز كينوونەر اكادەمياسى جورج جانە ريتا سادۋل اتىنداعى جۇلدەنىڭ يەگەرى، بىرنەشە بەدەلدى حالىقارالىق كينوفەستيۆالدەردىڭ جۇلدەگەرى. ول 1946 -جىلى 7 - ناۋرىزدا وڭتۇستىك قازاقستان وبلىسىندا دۇنيەگە كەلگەن. 1965 -جىلى قازمۋ- ءدىڭ فيلولوگيا فاكۋلتەتىن بىتىرگەن. 1969 -جىلى بۇكىلوداقتىق كينەماتوگرافيا ينستيتۋتىن، 1984 -جىلى ماسكەۋدەگى جوعارى كينورەجيسسەرلىك كۋرسىن ءتامامداعان. ءوز سسەناريلەرىنىڭ نەگىزىندە بىرنەشە سۇبەلى دەرەكتى جانە كوركەمسۋرەتتى فيلمدەر ءتۇسىردى.
ايتالىق، «سوزاقتان شىققان گاملەت» (1990 ج. )، «كوزىمنىڭ قاراسى» (1995 ج. )، «ومپا» (1998 ج.)، «مۇستافا شوقاي» (2008ج. )، «امانات» (2015ج. ) ت. ب.
اۆتور: الماس مۇقاش
