تامارا دۇيسەنوۆا ايەل مەن ەركەك جالاقىسىنىڭ تەڭسىزدىگىنە قاتىستى پىكىر ءبىلدىردى
«جالاقى ماسەلەسىنە قاتىستى مىنانى اتاپ وتكىم كەلەدى. ەگەر استانا، اقتوبە جانە وڭتۇستىك قازاقستان وبلىسىندا ماتەماتيكادان ساباق بەرەتىن ايەل ۇستازداردى الىپ قارايتىن بولساق، وندا ولار بىردەي جالاقى الادى. سەبەبى ولاردىڭ ءبىلىم بەرۋ ستاندارتتارى بىركەلكى. ەگەر تاۋ-كەن ءوندىرىسى سالاسىندا، زياندى وندىرىستە جۇمىس ىستەيتىندەردىڭ جالاقىسى زياندى وندىرىستە جۇمىس ىستەمەيتىندەرگە قاراعاندا، ارينە ايىرماشىلىعى بار. ويتكەنى، جۇمىستارى قيىن ءارى ءبىرشاما ەرەكشەلىگى بار. وسىعان وراي، جالاقىدا كەمسىتۋشىلىك بار دەيتىندەرمەن كەلىسپەيمىن. بارلىعى جۇمىس كولەمىنە، قيىندىعىنا جانە جاعدايعا بايلانىستى»، - دەدى مينيستر بۇگىن ۇكىمەت ۇيىندە وتكەن باسپا ءسوز ءماسليحاتى بارىسىندا.
ونىڭ اتاپ وتۋىنشە، ەلىمىزدە ايەلدەر نەگىزىنەن قىزمەت كورسەتۋ جانە الەۋمەتتىك سالالاردا جۇمىس ىستەيدى.
«بىزدە ايەلدەردىڭ جۇمىس ىستەۋىنە تىيىم سالىنعان وندىرستەردىڭ ءتىزىمى بار. ەڭبەك كودەكسىندە دە جۇكتى، 1 جاسقا تولماعان، 3 جاسقا تولماعان بالاسى بار ايەلدەر ءۇشىن وتە كوپ جەڭىلدىكتەر قاراستىرىلعان. مۇنىڭ بارلىعى دا جالاقىعا اسەر ەتەدى»، - دەدى تامارا دۇيسەنوۆا.
ايتا كەتەيىك، 7- ناۋرىز كۇنى ەلباسى نۇرسۇلتان نازاربايەۆ قازاقستاننىڭ ايەلدەر قاۋىمى وكىلدەرىمەن «كوكتەم شۋاعى» اتتى كەزدەسۋ بارىسىندا ايەلدەردىڭ ورتاشا كىرىس دەڭگەيى ەركەكتەرمەن سالىستىرعاندا ءالى كۇنگە دەيىن ۇشتەن ءبىر مولشەرگە تومەن ەكەندىگىن ايتقان بولاتىن.
«مۇنداي جاعدايدىڭ ورىن الۋىنىڭ باستى سەبەبىنىڭ ءبىرى ۇكىمەت بەكىتكەن ايەلدەر ەڭبەگىن قولدانۋعا تىيىم سالىنعان جۇمىستار ءتىزىمى»، - دەگەن ەدى نۇرسۇلتان نازاربايەۆ.
اۆتور: مارلان جيەمباي