مانەزا، پودوبەدوۆا، چينشانلو جاتتىعۋلارىن جالعاستىرۋدا
الداعى ۋاقىتتا پودوبەدوۆا جانە چينشانلو 2020 -جىلى وتەتىن توكيو وليمپياداسىندا باقتارىن سىناۋى مۇمكىن، دەپ حابارلايدى قازاقپارات ءتىلشىسى. ال اتالعان دوداعا مايا مانەزا قاتىسادى ما، ازىرگە بەلگىسىز. بۇگىن بۇل جونىندە الماتى وبلىستىق دەنە شىنىقتىرۋ جانە سپورت باسقارماسىنىڭ باسشىسى تۇراتبەك شاراپيەۆ ءمالىم ەتتى.
«زۋلفيا چينشانلو جاس سپورتشى. توكيو وليمپياداسىنا قاتىسۋى ءتيىس. مۇنداي مۇمكىندىك سۆەتلانا پودوبەدوۆادا دا بار. ال مايا مانەزا توڭىرەگىندە ءبىراز سۇراقتار تۋىنداۋدا. ءقازىر وسى ۇشەۋى ناقتى سپورتتان شەتتەتىلگەن جوق. اۋىر اتلەتيكادان قازاقستان قۇراما كومانداسىندا جاتتىعۋلارىن جالعاستىرىپ جاتىر. وزدەرىڭىزگە بەلگىلى، 2018 -جىلى جازعى ازيادا ويىندارى وتەدى. ولار وسى دوداعا دايىندىقتارىن شىڭدايدى دەگەن ۇمىتتەمىز»، دەدى شاراپيەۆ.
باسقارما باسشىسىنىڭ سوزىنشە، حالىقارالىق وليمپيادا كوميتەتى اتالعان سپورتشىلاردىڭ مەدالدارىن الىپ، ناتيجەلەرىن جويعانىمەن، زىلتەمىرشىلەر سپورتپەن قوشتاسپايدى. سەبەبى، حالىقارالىق اۋىر اتلەتيكا فەدەراتسياسى مايا مانەزا، زۋلفيا چينشانلو جانە سۆەتلانا پودوبەدوۆانى سپورتتان شەكتەتۋ جونىندە ناقتى شەشىم شىعارماعان.
سونداي- اق جيىن بارىسىندا رەسپۋبليكالىق جانە حالىقارالىق جارىستاردا جوعارى ناتيجەلەرگە جەتكەن سپورتشىلارعا اي سايىن وبلىس اكىمىنىڭ سىياقىسى تولەنەتىنى ايتىلدى. ءوڭىردىڭ 60 ۇزدىك جانە 21 مۇگەدەك- سپورتشىسى 30 مىڭنان 300 مىڭعا دەيىن سىياقى الادى. قازىر وبلىس تۇرعىندارىنىڭ 27 پايىزى ياعني 520 مىڭنان استام ادام جۇيەلى تۇردە سپورتپەن شۇعىلدانۋدا.
اۆتور: سامال قابىشەۆا
