سوت وڭتۇستىك كورەيا پرەزيدەنتىن تاعىنان الاتىن بولدى

استانا. قازاقپارات - وڭتۇستىك كورەيانىڭ كونستيتۋتسيالىق سوتى پرەزيدەنت پاك كىن حەگە جاريالانعان يمپيچمەنتتى ماقۇلدادى.

بۇل تۋرالى داۋىس بەرۋ قورىتىندىسى جونىندەگى كونستيتۋتسيالىق سوت ۇكىمىندە ايتىلعان، دەپ حابارلايدى ت ا س س اگەنتتىگى.

وسىلايشا، 10- ناۋرىز ونىڭ مەملەكەت باسشىسى رەتىندەگى سوڭعى كۇنى بولدى. الايدا، بۇعان دەيىن وڭتۇستىك كورەيا پرەزيدەنتتەرى اراسىندا مۇنداي وقيعا بولماعاندىقتان، ونىڭ مەملەكەتتىك رەزيدەنتسيانى قاشان بوساتۋى تيىستىگى ءالى بەلگىسىز.

زاڭعا سايكەس، مەرزىمنەن تىس جاڭا پرەزيدەنتتىك سايلاۋ 60 كۇن ىشىندە ءوتۋى ءتيىس، كۇنتىزبەلىك ەسەپ بويىنشا، سايلاۋ شامامەن 9- مامىردا بولادى. پاك كىن حە ەلدىڭ بۇرىنعى پرەزيدەنتتەرىنە بەرىلەتىن ارتىقشىلىقتاردان: جالاقىنىڭ %70 كولەمىندەگى ومىرلىك زەينەتاقىدان (شامامەن 12 ميلليون ۆون نەمەسە $10,4 مىڭ)، ءۇش كومەكشىدەن، جەكە جۇرگىزۋشى مەن مەملەكەتتىك كلينيكالارداعى تەگىن مەديتسينالىق قىزمەت كورسەتۋدەن ايىرىلادى.

سونىمەن بىرگە، وعان 10 جىلعا ەمەس، تەك 5 جىلعا كۇزەت بەرىلەدى. سونداي-اق، ەكس- پرەزيدەنت قىلمىستىق تەرگەۋگە تارتىلماۋ يممۋنيتەتىنەن ايىرىلادى.

دەمەك، وڭتۇستىك كورەيالىق پروكۋراتۋرا پاك كىن حەدەن جاۋاپ الىپ، اسىرەسە، ونىڭ جاقىن قۇربىسى چحۆە سۋن سيل مەن Samsung كومپانيالار توبىنىڭ باسشىسى لي چجە ەننىڭ داۋلى جەمقورلىق ىستەرىنە قاتىستى ءبىراز ماسەلەنىڭ بەتىن اشادى دەگەن ءسوز.

پروكۋراتۋرا پرەزيدەنتتىڭ بۇل قىلمىستىق ارەكەتكە قاتىسى بار دەپ ەسەپتەيدى. بۇعان دەيىن پاك كىن حە تەرگەۋمەن ىنتىماقتاسۋدان باس تارتىپ، ونى «ساياسي تاپسىرىس» دەپ اتاعان بولاتىن.