مۇحتار ءابليازوۆ سىرتتاي سوتتالۋى مۇمكىن

استانا. قازاقپارات - قازاقستان مۇحتار ءابليازوۆتى سىرتتاي سوتتاماق. پروكۋرورلار قاشقىن بانكيرگە قاتىستى ءىستى سوتقا جىبەردى دەپ حابارلايدى «ك ت ك» ارناسى.

مەملەكەت ءتىپتى ادۆوكات تا جالداپ قويعان ەكەن. تەرگەۋ ماتەريالدارىنىڭ قورىتىندىسى سوعان تابىستالدى.

«مۇحتار ءابليازوۆ قازاقستانعا كەلۋدەن باس تارتىپ وتىر. سوندىقتان وعان قاتىستى ءىس سوتقا جىبەرىلدى. ەلىمىزدىڭ زاڭىنا ساي، ايىپتالۋشى باسقا مەملەكەتتە بولىپ، سوت الدىندا جاۋاپ بەرۋدەن قاشسا، ونىڭ قاتىسۋىنسىز سوت پروتسەسىن وتكىزۋگە بولادى»، - دەيدى باس پروكۋراتۋرا.

ايتا كەتەيىك، جەمقورلىققا قارسى ۇلتتىق بيۋرو ءابليازوۆتى اقپان ايىندا شەتەلدىك جانە وتاندىق باسپا ءسوز ارقىلى ەكى رەت تەرگەۋگە شاقىرعان. ءبىراق، وليگارح ونى ەلەگەن دە جوق. ەندى قاشقىن بانكيردىڭ سوتقا دا كەلمەيتىنى انىق.

ەستەرىڭىزگە سالساق، ءابليازوۆقا قاتىستى قىلمىستىق توپ قۇردى جانە «ب ت ا» بانكى سالىمشىلارىنىڭ اقشاسىن جىمقىردى دەگەن ايىپتار تاعىلعان. ءابليازوۆتىڭ ءتىپتى، ازاماتتاردىڭ زەينەتاقى قورىنداعى قارجىسىنا دا قول سالعانى ايتىلدى.

ءسويتىپ، جالپى 7 جارىم ميلليارد دوللاردى وففشورلىق كومپانيالارى ارقىلى جىمقىرعان. جەمقورلىققا قارسى ۇلتتىق بيۋرو اتىشۋلى وليگارحتىڭ ءىسىن 8 جىلعا جۋىق تەرگەپ، 2 مىڭ 224 توم ماتەريال جيناپتى.

كۇدىكتىلەر قاتارىندا «ب ت ا» بانكتە ءابليازوۆتىڭ قاراماعىندا ىستەگەن 3 توپ- مەنەدجەر دە بار.