تۇڭعىشباي جامانقۇلوۆتىڭ ىسىنە قاتىستى جاڭا دەرەك شىقتى
بيۋجەتتىڭ 69 ميلليون تەڭگەسىن جەدى دەگەن اتاقتى اكتەر وزىنە تاعىلعان ايىپتى باسىندا مويىنداپ، ەندى ونىمەن كەلىسپەيمىن دەپ وتىر دەپ حابارلايدى «ك ت ك» ارناسى.
كەشەگى سوتتا تۇڭعىشباي جامانقۇلوۆ باستاعان 9 ادامعا قاتىستى ايىپتاۋ قورىتىندىسى وقىلدى. وندا سول كۇيى تۇسىرىلمەي قالعان «فەنيكس» فيلمىنە بولىنگەن قارجىنىڭ قالاي ۇرلاعانى بۇگە-شىگەسىنە دەيىن قامتىلعان.
پروكۋروردىڭ ايتۋىنشا، جامانقۇلوۆ اقشانىڭ باسىم بولىگىن جالعان كەلىسىم-شارتتار جاساپ، جەكەلەگەن كومپانيالار ارقىلى جىمقىرىپتى. 69 ميلليون تەڭگەنى قالتاسىنا باسقانىن جامانقۇلوۆتىڭ ءوزى دە بۇعان دەيىن مويىنداعان بولاتىن.
ءتىپتى 6 ميلليونىن مەملەكەتكە قايتارىپ بەرىپ، قالعان بولىگىن دە وتەۋگە ۋادە ەتكەن. الايدا اياق-استى سوزىنەن اينىعان قازاقستاننىڭ حالىق ءارتىسى بۇگىن وزىنە تاعىلعان ايىپپەن كەلىسپەيتىنىن جەتكىزدى. ءبىراق جامانقۇلوۆتىڭ ءوزى دە، ادۆوكاتتارى دا ازىرگە بۇعان قاتىستى تۇسىنىكتەمە بەرۋدەن باس تارتىپ وتىر.
