اقبوتا كەرىمبەكوۆا تۇرمىسقا شىقتى
ءانشىنىڭ ومىرىندە وڭ وزگەرىستەر دە بولىپ جاتىر. جۇرت شۋلاعان بولجام ياعني اقبوتانىڭ تۇرمىسقا شىققانى راس ەكەن.
الدىمەن شۋلى ۆيدەوعا قاتىستى ءانشى بولعان جايتتى اشىق اڭگىمەلەپ بەرگەن ەدى.
«ول جاعداي ءۇش نەمەسە، ءتورت جىل بۇرىن بولعان. ناقتى ەسىمدە ەمەس. مەنىڭ قاسىمدا ارىپتەستەرىم دە بولدى. بارلىعىمىز تالدىقورعان قالاسىنا تويعا شاقىرتۋ العانبىز. توي ۇيىمداستىرۋشى جىگىت، وزىمنەن ءتورت جاستاي ما كىشى بولسا كەرەك، جاس بالا. كۇتىپ العان ساتتەن- اق، اماندىق- ساۋلىق سۇراسپادى.
مەن قاسىمداعىلارعا، انا جىگىتتىڭ ءبىزدى مەنسىنبەي تۇرعانىن ايتتىم. ونداي ادامداردى پاسىق دەيدى. سوسىن، كولىكتە وسى تۋرالى سويلەسىپ، ارامىزدا تۇسىنىسپەۋشىلىك تۋىندادى. تۇسىنىسپەۋشىلىك دەگەندە ۇرىس ەشتەڭە بولعان جوق. تەك انا جىگىتتىڭ ادامدىق قاسيەتىنە كۇمانىم بولدى. سودان توي بولدى، ءانىمىزدى سالدىق. كەتەيىك دەسەك، اقىمىزدى بەرمەيدى. ول جەردە تەك مەن ەمەس، بارلىعىمىز گونورارىمىزدى ارەڭ الدىق دەپ ايتا الامىن. ءيا شۋ شىقتى»، - دەيدى ءانشى.
ۆيدەونى تاماشالاعان جۇرت ءتۇرلى پىكىرلەر جازدى. كوپشىلىگى ءانشىنى تويعا شاقىرىپ، ادال اقىسىن بەرمەي اۋرەلەپ قانا قويماي، بولعان جاعدايدى جەلىگە جۇكتەگەن جىگىتتەردى ايىپتادى. ال، كەي وقىرمان ءانشىنى ىشىمدىك ىشكەن دەپ ويلاپتى.
«مەن ارينە ادال ەڭبەگىم ءۇشىن كۇرەستىم. مەنىڭ تابىسىما قاراپ وتىرعان بالالارىم بار. تويعا شىققانىم ءۇشىن ەشكىمنىڭ الدىندا ايىپتى ەمەسپىن. كەلىسىم بويىنشا 3 مىڭ ا ق ش دوللارىن تولەۋى كەرەك بولعان. مۇمكىن مەنىڭ اقىمدى سول ۇيىمداستىرۋشىلار اۋرەگە سالا وتىرىپ، يەمدەنىپ الماقشى بولعان شىعار. ول مەنىڭ ادال ەڭبەگىم. سوندىقتان تالاپ ەتۋگە قۇقىلىمىن. ال، مەنى ىشىمدىك ءىشتى دەپ اڭگىمە ەتۋ دۇرىس ەمەس.
ول ادامنىڭ جەكە باسىنىڭ ءىسى. ودان قالسا ۆيدەودا مەن اياعىمنان تۇرا الماي، ۇياتتى قىلىق جاساپ تۇرعان جوقپىن. ونى جاسىرىن ءتۇسىرىپ العان جىگىتتەردە دە ۇيات جوق ەكەن. ولاردى اللاعا تاپسىردىم، جازالارىن ءوزى بەرسىن. ول كىسىلەرگە ايتارىم، بىرەۋگە ور قازعانشا، ءوز اماندىقتارىن تىلەپ جۇرسە ەكەن. مەن تەك بالالارىمنىڭ بولاشاعىنا الاڭدايمىن. ولاردىڭ تاربيەسىنە وسىنداي دۇنيەلەر كەرى اسەرىن بەرمەسە ەكەن دەيمىن. سوندىقتان دا، حالقىم، ءبىر زاتتى كورگەندە اقيقاتىن بىلمەي جاتىپ جاماندىققا جورىپ، تاراتۋعا اسىقپاڭىزدارشى.»، - دەيدى ءانشى.
اقبوتا كەرىمبەكوۆا بۇل ۆيدەونى تۇسىرگەن ءارى تاراتقان ادامداردى ىزدەپ، جازاعا تارتۋعا دا ۋاقىتىن قيمايتىنىن ايتتى. سەبەبى، ءانشى قازىر بوس ۋاقىتىن وتباسىنا، قۋانىشتى ساتتەردىڭ قىزىعىنا بولگىسى كەلەدى. اقبوتانىڭ ومىرىندەگى جۇرت بولجاعان جاڭالىق تا راس بولىپ شىقتى.
«ءيا جۇرتتىڭ شۋلايتىنىنداي بار، راسىمەن دە مەن تەڭىمدى تاۋىپ، تۇرمىسقا شىقتىم. سىزدەرگە ءبىرىنشى رەت ايتىپ وتىرمىن. تويىمىز ءالى بولعان جوق. الداعى ورازادان كەيىن، جاقىن ادامدارىمىزدىڭ ورتاسىندا اتاپ ءوتۋدى جوسپارلاپ جاتىرمىز»، - دەدى ءانشى.
جۇرت بۇعان دەيىن اقبوتا مەن اباي بەگەيدىڭ دۋەتتەرى مەن سۋرەتتەرىنە قاراپ، ولاردى قوسىپ تا ۇلگەرگەن بولاتىن. انشىدەن كۇيەۋ جىگىتتىڭ كىم ەكەنىن دە سۇراپ كورگەن ەدى.
«ءبىز اباي بەگەي ەكەۋمىز ونەردە جاقسى ارىپتەسپىز، جاقسى دوسپىز. ءبىراق مەنىڭ جارىم مۇلدە باسقا ادام. ارينە ونەرگە قاتىسى بار. ءبىراق ونداي تانىمال ەمەس. ەسىمى راۋان بولادى»، - دەدى ءانشى.
