نۇرلان نىعماتۋلين ەكسپو كورمەسىنە بيلەت ساتىپ الدى

استانا. قازاقپارات - بۇگىن ءماجىلىس ءتوراعاسى نۇرلان نىعماتۋلين مەن ءبىرقاتار دەپۋتاتتار «استانا ەكسپو-2017» اۋماعىندا بولىپ، قۇرىلىس نىساندارىمەن تانىستى جانە حالىقارالىق كورمەگە دايىندىق ماسەلەسىنە ارنالعان كەڭەسكە قاتىستى،

 دەپ حابارلايدى قازاقپارات.

«ەكسپو-2017 نىساندارىن ارالاۋ بارىسىندا ن. نىعماتۋلين حالىقارالىق كورمەگە بيلەت ساتىپ الدى. وسى ورايدا ءماجىلىس ءتوراعاسى بۇگىندە كورمە جاھاندىق ۇلتتىق جوبا مارتەبەسىنە يە بولىپ وتىرعاندىعىن اتاپ ءوتتى»، - دەلىنگەن ءماجىلىس باسپا ءسوز قىزمەتىنىڭ حابارلاماسىندا.

 ول قازىرگى كەزدە كورمە اياسىندا اۋقىمدى جۇمىستار اتقارىلعانىنا توقتالا كەلە، تاياۋ ۋاقىتتا استانا ەنەرگيا ۇنەمدەۋ مەن بالامالى ەنەرگيا كوزدەرىن پايدالانۋدا الەمدىك ۇزدىك تەحنولوگيالار ءۇشىن ورتالىق الاڭعا اينالاتىنىن اتاپ ءوتتى.

«قازاقستان پرەزيدەنتى نۇرسۇلتان ءابىش ۇلى نازاربايەۆتىڭ حالىقارالىق جوعارى بەدەلىنىڭ ارقاسىندا ەلىمىز وسى بىرەگەي شارانى وتكىزۋ قۇقىعىنا يە بولدى»، - دەپ ەسكە سالىپ ءوتتى نىعماتۋلين.

ونىڭ سوزىنە قاراعاندا، كورمەگە دايىندىق اياسىندا دەپۋتاتتىق كورپۋس تا ەلەۋلى ۇلەس قوستى، ياعني حالىقارالىق كورمەلەر تۋرالى كونۆەنتسيا راتيفيكاتسيالاندى، ەكسپو-2017 حالىقارالىق مامانداندىرىلعان كورمە ماسەلەلەر جونىندە زاڭ قابىلداندى. «استانا ەكسپو-2017» ۇلتتىق كومپانياسىنىڭ وكىلدەرى قۇرىلىس بارىسى جايىندا تىڭعىلىقتى مالىمەت بەرىپ، الداعى ۋاقىتتا اتقارىلاتىن شارالار جايىندا بايانداپ بەردى.

ايتا كەتەيىك، ۇلتتىق پاۆيلوننىڭ قۇرىلىسى 2017 -جىلدىڭ مامىر ايىندا تولىقتاي اياقتالادى. قازىرگى كەزدە بۇل نىساندا ىشكى قۇرىلىس جۇمىستارى ءجۇرىپ جاتىر.

 اۆتور: رۋسلان عابباسوۆ