قازاقستاندا حالىقارالىق تۋريستىك جاڭا باعدار ءساۋىر ايىندا جۇزەگە اسادى
بۇل تۋرالى ق ر ينۆەستيتسيالار جانە دامۋ مينيسترلىگىنىڭ تۋريزم يندۋسترياسى دەپارتامەنتىنىڭ ديرەكتورى مارات يعالي فەيسبۋكتاعى پاراقشاسىندا جاريا ەتتى، دەپ حابارلايدى قازاقپارات ءتىلشىسى.
مارات يعاليدىڭ حابارلاۋىنشا، بۇكىل الەمدىك تۋريستىك ۇيىمنىڭ باستاماسىمەن جىبەك جولى ەلدەرىنىڭ تۋريزم مينيسترلەرىنىڭ كەزدەسۋىندە ول قىرعىز ەلىنىڭ مادەنيەت، اقپارات جانە تۋريزم مينيسترلىگى تۋريزم يندۋسترياسى دەپارتامەنتىنىڭ ورىنباسارى ازامات جامانقۇلوۆپەن كەزدەسكەن.
«ءبىز تۇرىك كەڭەسى اياسىندا جىبەك جولى باعىتىمەن جاڭا تۋريستىك باعىت اشۋ ماسەلەسىن تالقىلادىق. بۇل تۋريستىك باعىتتىڭ پيلوتتىق جوباسىن تۇركيا، ازەربايجان، قازاقستان، قىرعىزستان ەلدەرى ارقىلى 2017-جىلدىڭ ءساۋىر ايىنان ىسكە قوسۋ جوسپارلانىپ وتىر. 12 كۇن ىشىندە تۋريستەر 4 مەملەكەتتى ارالايدى»، - دەپ جازدى م. يعالي.
ونىڭ ايتۋىنشا، تۋريستەر قازاقستاندا الماتى قالاسىندا بولىپ، شىمبۇلاق، كوكتوبە، كولسايعا بارادى. سودان كەيىن، 2017-جىلى تۇركى الەمەنىڭ استاناسى دەپ تانىلعان تۇركىستان قالاسىنا ساپار شەگەدى. «سونىمەن قاتار، تۋريستەر جامبىل وبلىسىنداعى قازاق حاندىعى قۇرىلعان كيەلى مەكەننىڭ ءبىرى اۋليە اتاعا زيارات ەتە الادى»، - دەدى ول.
اۆتور: الماس مۇقاش ۇلى
