شەتەلدىككە تۇرمىسقا شىققان قازاق قىزى: قارا ءناسىلدى كۇيەۋدەن جۇدىرىعىن الا جۇگىرەتىن قازاق جىگىتى ارتىق بولعانى ما؟
ءدال سول كەزدە بۇل سوزدەرىنىڭ ماعىناسىنا ءمان بەرمەگەن ەدىم. تەك قۇربىلارىم فەيسبۋك جەلىسىندە شەتەل ازاماتتارىنا تۇرمىسقا شىققان قىزداردىڭ باقىتسىز ءومىرى جايىندا جارىسا جازعاندارى كوڭىلىمە قانجارداي قادالدى. ەڭ باستى نازارعا العانىم، قارا ءناسىلدى جىگىتتەرگە تۇرمىسقا شىققان قازاق قىزدارىنىڭ ءومىرى بولدى.
«اتا- انام ءۇشىن قارا ءناسىلدى كۇيەۋ بالادان گورى مەنى ۇرىپ- سوعاتىن قازاق كۇيەۋ بالا الدەقايدا ارتىق ەدى»
جانار - شىمكەنتتىڭ ارۋ قىزى. سالت- ءداستۇردى قاتاڭ ۇستانعان وتباسىندا تاربيەلەنگەن قاراپايىم قازاقتىڭ قىزى. 28 جاسىندا وڭتۇستىكتىڭ سالتىمەن تۇرمىسقا شىقتى، ءساتسىز تۇرمىسقا شىقتى دەسە دە بولادى. ۋاقىت وتە كەلە جۇمىسىنان ايىرىلعان جاناردىڭ كۇيەۋى ونى بالاعاتتاۋدى، ودان قالسا ۇرۋدى شىعاردى. ۋاقىتشا مىنەز كورسەتۋى شىعار دەپ جانار شىداپ ءجۇردى. الايدا، كۇيەۋى دورەكىلىگىن دوعارمادى. ءسويتىپ، جانار زاتتارىن جيناپ، ۇيىنەن كەتىپ قالادى. كەتكەندە دە الىسقا كەتتى، امەريكاعا. ۆاشينگتوننىڭ ءبىر كوڭىلدى وتىرىسىنان قىز دەۆيد ەسىمدى جىگىتتى كەزدەستىرەدى. ءبىر- بىرىنە ءبىر كورگەننەن عاشىق بولعان قىز بەن جىگىت جاقىنىراق ارالاسا باستايدى. ءتىپتى، ءبىر- ءبىرىن جاقسى تۇسىنەتىن حالگە جەتەدى. ءبىر جولى ەكەۋىنىڭ سۋرەتى بايقاۋسىزدا عالامتور جەلىسىنە تارالىپ كەتەدى. سول ساتتەن باستاپ جاناردىڭ تۋىستارى قىزدى ەلىنە قايتارماق بولادى. ال جانار دەۆيدتىڭ جانىندا ءوزىن باقىتتى سەزىنەتىن، كۇيەۋىمەن بولعان ءساتسىز ەستەلىكتەر قىزدىڭ كوڭىلىن ەندىگى مازالامايتىن بولعان. جىگىتتەن ايىرىلعىسى كەلمەگەن جانار سۋرەتتەرىنىڭ عالامتورعا تارالىپ كەتپەۋىن قاتاڭ قاداعالاپ ءجۇردى، ءوزى دەۆيدپەن ارالاسۋىن دوعارمادى. جارتى جىل تانىستىقتارىنان سوڭ دەۆيد جانارعا ۇيلەنۋگە ۇسىنىس جاسايدى. اتا- انالارىنا ەسكەرتپەستەن جاستار ۇيلەنىپ الادى. وقۋىن ءتامامداعاننان كەيىن جانار ءۇي ىشىنە امەريكادان جۇمىس تاپتىم دەپ الداپ، قالىپ قويادى. 2 جىلدان كەيىن جاس وتباسى بالالى بولادى. ال تۋىستارى سول كۇيى حابارسىز ەدى. سەبەبى، اكەسى ءبىلىپ قويسا قىزدى ومىرىنەن ماڭگىگە وشىرەتىن ەدى. وتباسىنان دا ايىرىلعىسى كەلمەگەن جانار ءۇشىن ول كەزەڭدەر قيىنعا سوقتى. شىندىقتى ايتۋعا قانشا بەل بايلاسا دا ءداتى بارمادى. سەبەبى، اتا- اناسى ءۇشىن قارا ءناسىلدى كۇيەۋ بالادان گورى ونى ۇرىپ- سوعاتىن قازاق كۇيەۋ بالا الدەقايدا ارتىق ەدى.
«كۇيەۋىممەن تۇسكەن سۋرەتىم بىرەۋدىڭ سەزىمىن قورلايدى دەپ ويلامادىم»
بۇرىنعى الماتىلىق ارۋ مارجان قازاق جانە ورىس تىلدەرىنەن باسقا بىرنەشە ءتىلدى مەڭگەرگەن. قىزدىڭ ءبىلىمى ءۇشىن اتا- اناسى بارىن ايانبادى. تابىستى ارۋ قاشان دا جىگىتتەردىڭ نازارىندا بولاتىن. 6 ايعا تاجىريبەدەن ءوتۋ ءۇشىن بەرلينگە بارعان قازاق قىزى ستيۆ ەسىمدى بريتاندىق جىگىتتى كەدەستىرەدى. وقۋى اياقتالعان سوڭ مارجان الماتىعا قايتادى، بريتاندىق جىگىت تە الماتىعا قىزدىڭ ارتىنان كەلەدى. مارجاننىڭ اتا- اناسى شەتەلدىك كۇيەۋ بالاعا كەرىسىنشە قۋاندى، لوندونعا ءجيى بارىپ تۇرامىز دەپ قۋانىشتارى كوككە جەتتى. ءسويتىپ، جاستاردىڭ تويى دا وتەدى. مارجان قاي كەزدە دە ءاردايىم بەلسەندى بولاتىن، عالامتوردا دا. ءوز پاراقشاسىنا تويدىڭ، كەيىنىرەك باقىتتى وتباسىنىڭ سۋرەتتەرىن سالا باستايدى. الايدا، بۇل سۋرەتتەرى بۇرەۋدىڭ سەزىمىن قورلايدى دەپ ويلاماعان. ءبىر قۇربىسى مارجانعا ونىڭ وتباسى ادامدار اراسىندا قىزۋ تالقىعا سالىنىپ جاتقاندىعىن ەسكەرتەدى. العاشىندا قىز ءمان بەرمەي جۇرگەن، ءبىراق سۋرەتتەرىنە جازىلعان پىكىرلەردى كورگەندە جاعاسىن ۇستادى. مۇلدەم تانىمايتىن ادامداردىڭ ءوزى قىزدى ساتقىنعا بالاپ، قارعاعان. ءبىر بەلسەندى ونى ولتىرۋگە ۇسىنىس تاستاپتى. مارجان اقىرى بۇل توپقا شاعىمدانىپ، جاپتىرىپ تاستايدى. الايدا، جازىلعان پىكىرلەر كوڭىلىنەن كەتپەسى انىق ەدى. سول ساتتەن باستاپ جەلىگە سۋرەت سالۋدى دوعاردى.
«اعام مەنى «وتباسىمىزعا ەنگەن قارا داق» دەيدى، الايدا، مەن جىبەرگەن اقشادان باس تارتپايدى»
گۇلناز - اۋىلدا وسكەن قازاقتىڭ قىزى. اكەسى ەرتە قايتىس بولعاندىقتان، وتباسى جوقشىلىقپەن ارپالىسىپ كەلدى. ءسۇت ساتىپ كۇن كەشىپ ءجۇردى. مەكتەپ بىتىرگەن گۇلناز جوعارعى وقۋ ورىنا تەگىن تۇسەدى. وقۋ بارىسىندا قىز اللا جولىن تاڭداپ، ورامال تاعۋدى باستايدى. 42 جاسار ۇيلەنگەن ەر ادامعا تۇرمىسقا شىعادى. پايعامبارىمىزدىڭ ءتورت ايەلى بولعان، وندا تۇرعان ەشتەڭە جوق دەپ ءوز- ءوزىن جۇباتىپ جۇرەدى. الايدا، كۇيەۋىنىڭ جۇدىرىعىن عانا كورەتىن قىزدىڭ باقىتسىز كۇندەرى باستالادى. ۇلىن بوسانعان سوڭ اجىراسپاق بولادى، كۇيەۋى رۇقساتىن بەرمەدى. ءتىپتى، اۋىل مولداسى دا كۇيەۋىنە جاقتاسقان. اقىرى، گۇلناز بالاسىن الىپ، ءۇي كيىمىمەن قاشىپ كەتەدى. ءسويتىپ، جاڭا جۇمىسقا ورنالاسادى. ول جەردەگى كۇنى دە قاراڭعىلىققا تولى. 60 جاسار باستىعى قىزعا قىرىنداۋدى شىعاردى. قىز باس تارتقاندىقتان، جۇمىستان قۋىلادى. ءومىرى قور بولعان بەيباقتى تۋىستارى كىم كورىنگەنمەن تانىستىرا باستايدى. ەڭ باستىسى، تۇرمىسقا شىقسا بولعانى. «ءوز- ءوزىمدى ولتىرمەك بولدىم، ءبىراق ۇلىمدى ويلادىم. بىردە قۇربىم ەۋروپادا جاقسى تابىس تابۋعا بولاتىنىن ايتتى. ەش ويلانباستان زاتتارىمدى جينادىم دا، شەتەلگە تارتىپ تۇردىم. قولىمداعى باردىڭ ءبارىن ساتتىم، ماعان كومەكتەسىپ، ءۇي جاعىن قاراستىرىپ بەرگەن ازاماتتار تابىلا كەتتى. وسىلاي دا ءومىر سۇرۋگە بولادى ەكەن- اۋ. جۇمىس ىستەدىم، ەۋروپالىق جىگىتكە تۇرمىسقا شىقتىم. بۇگىنگى كۇنى الەكس ەكەۋمىزدىڭ قىزىمىز بار، ۇشىنشىسىنە اياعىم اۋىر. باقىتتى ايەلگە اينالدىم. ءبىراق اعام بۇل ويىما كونبەدى، ول ءۇشىن مەن وتباسىنىڭ باسىنا تۇسكەن قارا داق بولدىم، ءبىراق مەن جىبەرەتىن اقشادان باس تارتقان ەمەس. ال، جەلىدەگى سۋرەتتەرىمە «شوشقانىڭ قوينىندا جاتىر» ، «قانداي جيىركەنىشتى» دەگەن پىكىرلەر دە كەزدەستى» ، - دەپ ويىمەن ءبولىستى گۇلناز.
بۇل وقيعالار ومىرىمە كەدەرگىسىن تيگىزبەس. مەن دە لوندوندا تۇرمىس قۇردىم، ءبىراق قازاقپەن نەكەلەستىم. انام سولاي ايتقانى ءۇشىن ەمەس، ارامىزدا ناعىز ماحاببات بولدى.
اسەل كاپينانىڭ جەكە بلوگىنان اۋدارعان: گۇلىم جاقان «قامشى» سىلتەيدى
