استانادا قۇلاقتاندىرۋ جۇيەلەرى تەكسەرىلگەن كەزدە جۇرتتىڭ ۇرەيلەنىپ قالماۋىن ەسكەرتتى
استانا. قازاقپارات - ەرتەڭ 9 -ناۋرىزدا ساعات 9.00 دە استانا قالاسىنىڭ توتەنشە جاعدايلار دەپارتامەنتى 2 مينۋت بويى تەلە-راديو ارنالاردى ۇستاپ قالۋمەن، ەلەكترودابىلدارىن قوسۋ ارقىلى استانا قالاسىنىڭ قۇلاقتاندىرۋ جۇيەلەرى تەكسەرىلەدى.
اتالمىش تەكسەرۋ جوسپارلى بولىپ تابىلادى جانە اي سايىن جۇرگىزىلەدى، دەپ حابارلايدى قالا اكىمدىگىنىڭ سايتى.
«ەسكە سالامىز، توتەنشە جاعداي ورىن العان كەزدە نەمەسە توتەنشە جاعدايدىڭ ورىن الۋىنا قاۋىپ تونگەن كەزدە ەلەكترودابىلدار نەمەسە باسقا دا دابىل قۇرالدارى قوسىلادى، ول «بارشاڭىزدىڭ نازارلارىڭىزعا!» ءبىرىڭعاي قۇلاقتاندىرۋ دابىلىن بىلدىرەدى. بۇل دابىلدى ەستىگەن كەزدە تۇرعىندار مىندەتتى تۇردە قولايلى اقپارات قابىلداۋ قۇرالدارىن (حابار، قازاقستان، ەۆرازيا ءبىرىنشى ارنا، استانا، ك ت ك، ن ت ك- تەلەديدارلارىن؛ استانا FM، شالقار، رەترو FM، اۆتوراديو، قازاق راديولارىن) ءىس-ارەكەتتەر تۋرالى نۇسقاۋلار مەن اقپارات الۋ ءۇشىن قوسۋلارى كەرەك»، دەلىنگەن حابارلامادا.
استانا قالاسىنىڭ ت ج دەپارتامەنتى قالا تۇرعىندارىن سابىرلىق ساقتاۋعا، ۇرەيلەنبەۋگە شاقىرادى.
