جاس كەلىندەرگە تاربيە بەرەتىن «اجەلەر مەكتەبى» اشىلادى

استانا. قازاقپارات - پەتروپاۆل قالاسىنداعى قىزىلجار ورتالىق مەشىتىندە «اجەلەر مەكتەبى» جۇمىسىن باستاماق.

ۇيىمنىڭ باستى ماقساتى - ءدىن مەن ءدىلدى بايلانىستىرا وتىرىپ، جاس كەلىندەرگە وتباسىلىق ومىردە باعىت- باعدار بەرۋ، پسيحولوگيالىق كومەك كورسەتۋ، دەپ حابارلايدى Baq.kz ءتىلشىسى.

 ق ر ستاتيستيكا كوميتەتىنىڭ مالىمەتى بويىنشا سوڭعى ۋاقىتتا اجىراسۋ سانى جىل سايىن ءوسىپ كەلەدى. ال تىركەلىپ جاتقان نەكە سانى كەرسىنشە ازايعان. «اجەلەر مەكتەبىنە» ءدىن مەن ءداستۇردى بەرىك ۇستاناتىن ايەلدەر مۇشەلىك ەتەدى. ولار جاستاردىڭ ءدىني ساۋاتىن اشىپ، كۇندەلىكتى تۋىنداپ جاتاتىن وتباسىلىق ماسەلەردى شەشۋگە سەپتىگىن تيگىزبەك. ۇيىمداستىرۋشىلار مۇنداي ۇيىم اجىراسۋ سانىن ازايتۋعا سەپتىگىن تيگىزەتىنىنە سەنىمدى.

 «ادامزات بالاسىنا يسلام ءدىنى كەلگەننەن كەيىن عانا قوعامدا ايەل زاتى ءوز ورنىنا يە بولدى. وعان دەيىن كوپتەگەن ەلدەر قىز بالانىڭ تۋىلعانىن جاعىمسىز حابار رەتىندە قابىلداعان. ال بۇگىنگى كۇنى ايەلدەرگە ەشقانداي شەكتەۋ جوق. ەركىن ءبىلىم الادى. مەن قىزىلجار ورتالىق مەشىتىنىڭ ايەلدەر جاماعاتىنا ءدارىس بەرەمىن. نەگىزگى ساباق باعدارلاماسىمەن قاتار، شاكىرتتەردىڭ ناماز وقۋ، كۇندەلىكتى تۇرمىس- تىرشىلىك، ءوزارا قارىم- قاتىناس جايىندا سۇراقتارى كوپ بولادى. مىنە، وسىنداي ماسەلەلەرگە ومىردەن تۇيگەنى مول قاجى اپالارىمىزدىڭ ءاردايىم جاۋاپ تابارى انىق» ، - دەيدى پەتروپاۆل قالاسىنداعى قىزىلجار ورتالىق مەشىتىنىڭ ۇستازى سايدا سەيداليەۆا.

قىزىلجار ورتالىق مەشىتىندە وتەتىن دارىسكە قىز- كەلىنشەكتەرمەن قاتار، ورتا جاستاعى اپالار مەن جاسى ەگدە تارتقان اجەلەر دە كەلەدى. ءار شاكىرتتىڭ سۇرانىمىنا قاراي جەكە تاقىرىپتا وتكىزىلەتىن ساباقتار دا قاراستىلىلعان. ءبارى تەگىن.

« قىزىلجار ورتالىق مەشىتىنە كەلىپ، ءبىلىم العىسى كەلەتىندەرگە ەشقانداي شەكتەۋ جوق. ىنتاسى بار قىز بالالار دارىسكە قاتىسىپ جاتادى. بۇگىنگى بويجەتكەن - ەرتەڭگى انا. «سەندەردىڭ ەڭ جاقسى ايەلدەرىڭ، دۇنيەگە بالا اكەلىپ، قامقورشى بولعاندارى. اللاھقا نىق سەنىممەن يمان كەلتىرگەندەرى. ال ەڭ جامان ايەلدەرىڭ، جارتىلاي جالاڭاش كيىنىپ، مەنمەندىگى اسىپ تۇرعاندار. ەكىجۇزدى، بەتپاق ايەلدەر ەشۋاقىتتا ءجانناتقا كىرمەيدى. ساليقالى، ىزگى ايەلدەر اق قارعا سەكىلدى وتە از بولادى» دەيدى پايعامبارىمىز مۇحاممەد س. ا. س. ءحاديسى. سوندىقتان، قىز بالانىڭ تاربيەسىنە ەرەكشە كوڭىل بولگەنىمىز ابزال» ، دەيدى پەتروپاۆل قالاسىنداعى قىزىلجار ورتالىق مەشىتىنىڭ نايب يمامى قانات مۇستافين.

ناۋرىز ايىنىڭ سوڭىنا «اجەلەر مەكتەبىنىڭ» تۇساۋى كەسىلەدى. قوعامدىق ۇيىم مۇشەلەرى قىز- كەلىنشەكتەردىڭ سۇراقتارىنا جاۋاپ بەرىپ، قول ءۇشىن بەرۋگە ءازىر ەكەندىكتەرىن جەتكىزدى.

 

ەلميرا كالەنوۆا