مەڭتايدىڭ اناسىنىڭ ايتقاندارى

 استانا. قازاقپارات -  جازۋشى ءازىلحان نۇرشايىقوۆتىڭ "ماحاببات، قىزىق مول جىلدار" رومانىن وقىماعان قازاق وقىرمانى كەمدە- كەم. جاستىقتىڭ، بەرىك ماحابباتتىڭ سيمۆولى بولعان رومان ءبىر كەزدەرى جاپپاي وقىلدى.

 قازىر دە كوپ وقىلماسا، كەم وقىلمايدى. رومانداعى كەيىپكەر مەڭتاي -  جازۋشىنىڭ بيىك مۇراتىنان تۋعان باستى كەيىپكەردىڭ بىرى. ول -  كوركىنە مىنەزى ساي، ادەپتى قىز مەڭتاي. ونىڭ قاعازعا تۇسىرگەن «ءوز ويلارىم» اتتى قولجازباسىن وقي وتىرىپ، قازاق قىزىنىڭ جان سارايىمەن تانىسامىز. قابىلەت- قارىمى مەن تانىم- تۇسىنىگىن پايىمداپ، اپپاق جانىنىڭ استارىن كورەمىز. سونداي- اق، ادامگەرشىلىگى مول، جانى سۇلۋ، اجارىنا اقىلى ساي قىز ەكەندىگىن مويىندايمىز. ءبىز بۇگىنگى قۋانىشتى مەرەكەگە وراي، قازاق قىزدارىنىڭ كادەسىنە جارايدى دەگەن نيەتپەن مەڭتايدىڭ اناسىنىڭ قىزىنا جازعاندارىن ۇسىنامىز.

 ***

 ماحاببات -  بارشا بايلىقتان كۇشتى. ءبىراق كۇشتىگە دە كومەك كەرەك. سول سياقتى ماحاببات تا ءوزىن بايلىق پەن بارلىقتىڭ قوسا قولداۋىن ۇناتادى.

***

ءتىرى ادامنىڭ بار باقىتى جەر بەتىندە. وعان كوككە ۇمتىلۋدىڭ نەمەسە و دۇنيەدەن ءۇمىت ەتۋدىڭ قاجەتى جوق. سول سەبەپتى بار تەردى توگىپ، بارشا وي مەن اقىلدى جۇمساپ جەر بەتىن، تۇرعان ءۇيىڭدى جۇماق ەتە ءبىل.

***

ەشكىممەن بارقىلداپ ۇرىسپا، باعىڭدى جوياسىڭ.

***

 ەشقاشان ەشكىمدى جامانداما. ەڭ جامان دەگەن ادامنىڭ دا ءوز جاقسىلىعى بولادى.

 ***

بالاسى اراق ىشسە، شەشەسى ۋ ىشەدى. ماسكۇنەم جامان بالا جاقسى انانى اجالىنان بۇرىن كورگە كىرگىزەدى.

***

كوشەدە كولدەنەڭ تۇرا قالىپ، ءبىرىنىڭ ەرنىن ءبىرى جۇلىپ جەردەي بوپ جالماپ، جۇرت كوزىنشە ءسۇيىسىپ جاتقان قىز بەن جىگىتتە ار دا، ۇيات تا بولمايدى. ونداي ادەتتەن بەز، ونداي قۇربىدان اۋلاق بول.

 ***

 ءبىزدىڭ اۋىلدىڭ قازاقتارى باياعى ەسكى ادەتپەن ءالى كۇنگە دەيىن جۇزگە بولىنەدى. سودان سوڭ ءالى جەتكەنى ءالسىزىن اياعىنان شالىپ، بوتەن ءجۇزدىڭ بالاسى دەپ جۇدىرىقتاپ، جۇلمالاپ، جۇندەپ جاتادى. الاۋىزدىقتىڭ اتاسى -  ءجۇز جويىلسا ەكەن.

 ***

 شوشاڭداعان قىز شەشەنىڭ اتىنا كىر كەلتىرەدى.

***

 ايەلدىڭ جالاڭاش دەنەسى ەركەكتىڭ قۇمارلىعىن قوزدىرادى. سوندىقتان ايەلدىڭ ەركەك قۇمارلىعىن قوزدىراتىن اشىق -  شاشىق جەردى كوبەيتپەي جاۋىپ، جاريا ەتىلمەيتىنىن قىمتاپ ۇستاۋى ابزال. سوندا ەركەك ەلەڭدەمەيدى، ايەل الاڭدامايدى.

***

ءۇمىت كۇتكەن ۇلى وڭباعان بوپ كەتسە -  اكە سورلى؛ قىزى كۇيەۋگە وتپەسە -  شەشە سورلى؛ سۇلۋ دەپ العانى سۇيكىمسىز بوپ شىقسا -  جىگىت سورلى؛ قىران دەپ تيگەنى جاپالاق بوپ شىقسا -  جار سورلى.

 ***

 قىزعا قاتتى كۇلۋدىڭ قاجەتى جوق. جىگىتتەرگە ونىڭ جىميعانى دا جەتىپ جاتىر.

Massaget.kz