ىستانبۇلدا ايەلدەردىڭ بەيبىت شەرۋى ءوتتى

استانا. قازاقپارات - تۇركيادا حالىقارالىق ايەلدەر كۇنىنە وراي بەيبىت شەرۋ ءوتتى.

ايتۋلى مەرەكە قارساڭىندا ىستانبۇلداعى باكىر-كوي اۋدانىنىڭ ورتالىق الاڭىنا جيىلعان ءبىر توپ ۇكىمەتتىك ەمەس ۇيىم بەلسەندىلەرى نازىك جاندىلاردىڭ قۇقىعى اياق استى ەتىلىپ وتىرعاندىعىنا نارازىلىق ءبىلدىردى، دەپ حابارلايدى حابار 24 تەلەارناسى.

ۇيىمداستىرۋشىلار اسىرەسە، تۇركيادا تۇرمىستىق زورلىق-زومبىلىقتىڭ ءورشىپ تۇرعانىنا الاڭداۋلى. «ءۇمىت» قوعامدىق قورىنىڭ مالىمەتىنشە، بىلتىر وتباسىلىق داۋ-جانجالدان 400 گە جۋىق قىز-كەلىنشەك ومىرمەن قوش ايتىسقان. ونىڭ 85 پايىزى ءوز كۇيەۋى مەن سۇيىكتىسىنىڭ قولىنان قازا تاۋىپتى.

وسىلايشا تۇركيادا ءار 10 ايەلدىڭ 4 ۋى ەرلەر تاراپىنان زورلىق كورەدى ەكەن. سوندىقتان بۇگىنگى شەرۋگە شىققان بەلسەندى توپ بيلىك وكىلدەرىنەن نازىك جانداردىڭ قوعامداعى ورنى مەن ءرولىن ارتتىرۋدى تالاپ ەتتى. «ەلىمىزدە ايەلدەردىڭ قوعامدىق رولىنە نەمقۇرايلى كوزقاراس قالىپتاسقان. ويتكەنى ولاردىڭ قۇقىقتارى كۇن سايىن اياققا تاپتالىپ جاتىر. ال ۇكىمەت نازىك جاندارعا قارسى وزبىرلىق ازايدى دەپ ايتۋدان جالىقپايدى. الايدا شىنايى ومىردە جاعداي مۇلدەم بولەك.

مىسالى بيىل اقپان ايىندا تۇرمىستىق زومبىلىققا دۋشار ايەلدەردىڭ سانى وتكەن جىلمەن سالىستىرعاندا 38 گە وسكەن. ءبىز بۇل جانتۇرشىگەرلىك ارەكەتتەرگە توسقاۋىل قويۋىمىز كەرەك. ءوز قۇقىعىمىزدى وسىلايشا تالاپ ەتپەسەك، ەشكىم ءبىزدىڭ ماسەلەمىزدى شەشىپ بەرمەيدى»، - دەيدى شەرۋگە قاتىسۋشى ستۋدەنت زەحرا گيۋنەش.