كيەۆتە قازاق ءتىلىن مەڭگەرۋ كلۋبى اشىلدى

 استانا. قازاقپارات - ۋكراينانىڭ كيەۆ قالاسىندا قازاق ءتىلىن ۇيرەتۋ كلۋبى اشىلدى، دەپ حابارلايدى قازاقپارات ءتىلشىسى ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.

رەسمي اقپاراتقا سايكەس، اتالعان كلۋب جامبىل جابايەۆ اتىنداعى قوعامدىق كىتاپحانانىڭ جانىنان اشىلىپ وتىر. ال ونداعى ساباقتار قازاق دياسپوراسى وكىلدەرىنىڭ بالالارى ءۇشىن وتكىزىلەدى. كۋرس باعدارلاماسىندا قازاق ءتىلىنىڭ گرامماتيكاسى مەن لەكسيكاسى، سونداي- اق قازاق حالقىنىڭ ۇلى ويشىلدارىنىڭ ەڭبەكتەرىمەن تانىستىرۋ ساباقتارى كوزدەلگەن. قازاقستاننىڭ مادەني- تاريحي مۇراسى، ەكونوميكاسى مەن قوعامدىق- ساياسي ومىرىنە قاتىستى ارنايى دارىستەردى وتكىزۋ دە جوسپاردا بار. كلۋبتىڭ اشىلۋ سالتاناتىنا قاتىسقان قازاق دياسپوراسىنىڭ وكىلدەرى تۋعان تىلدەرىنىڭ شەت ەلدە ۇيرەنۋگە بەرىلگەن مۇمكىندىك ءۇشىن ءوز العىستارىن ءبىلدىردى.

 اۆتور: ارمان اسقاروۆ