نازاربايەۆ بالادان قالاي دانىشپان تاربيەلەپ شىعارۋعا بولاتىنىن ايتىپ بەردى
«بالا تۋرالى ءسوز قوزعاعان كەزدە ءبىر اڭگىمە ەسكە تۇسەدى. ءبىر كۇنى بالا مەكتەپتەن اناسىنا مۇعالىمىنىڭ حاتىن اكەلىپ بەرەدى. انا حاتتى اشىپ، وقىعان سوڭ، كوزىنەن ەرىكسىز جاس دومالادى. بالاسى اناسىنان: «اناشىم، نەگە جىلادىڭىز؟! حاتتا نە دەپ جازىپتى؟» دەپ سۇراي باستادى.
اناسى وعان: «حاتتا سەنى دانىشپان دەپتى، ەندى بۇل مەكتەپ سەنى ارى قاراي وقىتا المايتىنىن جازىپتى. سەن بۇدان بىلاي ۇيدە، اتا- انانىڭ قولىندا وزدىگىمەن وقۋىڭدى جالعاستىرۋىڭ كەرەك. كوپ جىلدار وتەدى، اناسى ومىردەن وزعان. ول ەسكى قاعازداردى اقتارىپ وتىرىپ، سول ءبىر حاتتى تاۋىپ الادى. وندا: «بالاڭىز اقىل- ەسى كەم دامىعان، ەندى ول ءبىزدىڭ مەكتەپتە وقي المايدى» دەپ جازىلىپتى. ول كىسى - توماس ەديسون. ونىڭ جارىق شامدارىن ءالى كۇنگە دەيىن ءبىز قولدانىپ ءجۇرمىز. ۇلى ونەرتاپقىش. اناسىنىڭ بەرگەن باعاسى مەن ۇلكەن سەنىمى ادامدى كەمەڭگەر ەتتى»، - دەدى پرەزيدەنت بۇگىن اقوردادا حالىقارالىق ايەلدەر كۇنى - 8 - ناۋرىز مەرەكەسىنە وراي، «كوكتەم شۋاعى» ايەلدەر قاۋىمداستىعىنىڭ نازىك جاندى وكىلدەرىمەن كەزدەسۋىندە.
«سىزدەر دە، بىزدەر دە، وتباسىنىڭ وتىنا قامقور بولۋ، بالاعا تاربيە بەرۋ سىزدەردىڭ باستى مىندەتتەرىڭىزدىڭ ءبىرى. انا سۇتىندە ءبىزدىڭ حالىقتىڭ الەۋمەتتىك جادى ساقتالعان. انالار ەڭبەككە، قاناعاتقا، ۇقىپتىلىققا تاربيەلەيدى. وتباسىندا تاربيە دەگەن ەڭ باستى قۇندىلىق. انا ايتقان بەسىك جىرى ادامدى ءومىر بويى بىرگە جۇرەدى دەپ تەگىن ايتپاعان عوي. بارلىعىمىز دا ەستە ساقتاپ ءجۇرمىز، ءتىپتى مەنىڭ دە ەسىمدە»، - دەپ اتاپ ءوتتى ەلباسى.
پرەزيدەنت ساياسي جاڭعىرتۋدا ايەلدەردىڭ دە ءرولى جوعارى ەكەنىن ەرەكشەلەپ ءوتتى.
«جاقىندا كونستيتۋتسيانى قاراستىردىق، ءبىرقاتار وزگەرىستىستەر ەنگىزدىك، بۇل زامان تالابى. وسىلاي ىستەۋ كەرەك بولدى. ءبىز ءوز قوعامىمىزدى بىرتىندەپ دەموكراتيالاندىراتىندىعىمىزدى، ونى جاقسارتىپ، قازىرگى زامانعا سايكەستەندىرە بەرەتىندىگىمىزدى بۇنىڭ الدىندا ايتقان بولاتىنبىز»، - دەپ جالعادى ءسوزىن پرەزيدەنت.
اۆتور: مارلان جيەمباي
