جىلقىنىڭ العاش قازاق دالاسىندا قولعا ۇيرەتىلگەنىن بارشا الەمگە كورسەتەمىز - كانادالىق رەجيسسەر

استانا. قازاقپارات - جىلقىنى العاش قولعا ۇيرەتۋ قازاقستان اۋماعىندا باستالدى. بۇل تۋرالى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا كانادىق رەجيسسەر، انتروپولوگ نايوبي تومپسون ءمالىم ەتتى، دەپ حابارلايدى قازاقپارات.

ايتا كەتەيىك، «قازاقستان» ر ت ر ك Clearwater Documentary Inc كومپانياسىمەن بىرلەسە وتىرىپ، «EQUUS» (جىلقى) اتتى دەرەكتى تريولوگياسى جوباسىن باستاماق.

«جىلقى مالى العاش رەت قازاق دالاسىندا قولعا ۇيرەتىلگەنىن جاقسى ءتۇسىنىپ وتىرمىز. وسى ورايدا بوتاي قونىسىنداعى بىرەگەي قازبا جۇمىستارىنىڭ ناتيجەسىنە سۇيەنە وتىرىپ، قازاقستان اۋماعىندا ەڭ العاش جىلقى جانۋارىنا نوقتا سالىنعانى تۋرالى دالەلدەر بار. بىزدە دەرەكتى تريولوگيا ارقىلى وسى تاريحي دەرەكتەردى ەگجەي-تەگجەيلى بارشا الەمگە كورسەتۋگە بىرەگەي مۇمكىندىك بار»، - دەدى نايوبي تومپسون.

بۇدان بۇرىن حابارلانعانداي، وسى دەرەكتى تريلوگياعا ءتورت مەملەكەت وكىلدەرى قاتىسادى. ياعني كانادا، ا ق ش، فرانسيا جانە گەرمانيا قامتىلىپ وتىر. بۇل ەلدەردەن دە ءتورت تەلەكومپانيا ءوز ۇلەستەرىن قوسادى. بىرلەسكەن جوبا 2018-جىلى اياقتالىپ، كوپشىلىك نازارىنا ۇسىنىلادى.

اۆتور: رۋسلان عابباسوۆ