ءبىلىم مينيسترلىگى ۇستازدارعا گۇل سىيلاۋعا تىيىم سالدى ما
بۇل تۋرالى ۆيتسە-مينيستر ەلميرا سۋحانبەرديەۆا ءمالىم ەتتى.
اقپاراتتى Sputnik قازاقستان سايتى تاراتتى
«بۇل سۇراق قازىر كوپ اتا-انانى الاڭداتىپ وتىر ەكەن. ويتكەنى، مينيسترلىككە قوڭىراۋ شالىپ، سۇراق قويعان اتا-انالار كوپ بولدى. ءبىراق، 8 -ناۋرىز مەرەكەسىنە وراي، ءبىزدىڭ قۇرمەتتى ۇستازدارعا گۇل سىيلاماسىن دەگەن قاۋلى بولعان جوق، بولمايدى دا، بولعان دا ەمەس. قازىر ءبىز ءتيىستى ورگاندارعا حات جىبەرىپ، ولاردىڭ ايماعىندا سونداي قاۋلى بولدى ما دەگەن ماسەلەنى تەكسەرىپ جاتىرمىز. ال، قازاقستان رەسپۋبليكاسىنىڭ ءبىلىم جانە عىلىم مينيسترلىگى بۇكىل جەرگىلىكتى ورگاندارعا، اۋداندىق، وبلىستىق ءبىلىم باسقارمالارىنا مۇنداي قاۋلى جولداعان جوق. بۇنى رەسمي تۇردە مالىمدەگىمىز كەلەدى»، - دەدى سۋحانبەرديەۆا كەشە ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ايتا كەتەيىك، الەۋمەتتىك جەلىدە 8-ناۋرىز مەرەكەسىنە وراي قازاقستاندىق ۇستازدارعا ەندى سىيلىق جاساۋعا، سونىڭ ىشىندە گۇل سىيلاۋعا بولمايدى دەگەن اقپارات تاراعان بولاتىن. ياعني، مۇعالىمدەرگە تارتۋ ەتىلگەن كەز كەلگەن سىيلىق پارا بولىپ ەسەپتەلەدى- مىس.
