و ق و- دا دالادان تابىلعان بالانىڭ قۇلاعىنىڭ تۇسىندا سيرەك كەزدەسەتىن بەلگى بار - دارىگەرلەر

استانا. قازاقپارات - وڭتۇستىكتە تاعى دا ءبىر تاستاندى بالا تابىلعانىن حابارلاعانبىز.

سايرام اۋدانىنا قاراستى اقبۇلاق اۋىلىندا تابىلعان شاقالاقتى اناسى تۋا سالىسىمەن سومكەنىڭ ىشىنە سالىپ، جالاڭاش كۇيىندە كوشەدە تاستاپ كەتكەن.

تۋعان اناسى قىستىڭ سۋىق كۇنىندە دالاعا تاستاپ كەتكەن شاقالاقتىڭ العاشقىدا جاعدايى اۋىر بولاتىن. جەدەل جاردەممەن جەتكىزىلگەن بالاقايعا دارىگەرلەر شۇعىل تۇردە قارقىندى تەراپيا جاساپ، ءومىرىن ساقتاپ قالعان.

قازىر تاستاندى بالا ينكۋباتوردا ەم قابىلداۋدا، دەپ جازادى وتىرار. ك ز.

دۇنيە ەسىگىن اشا سالىسىمەن تاعدىرى شىتىرمانعا اينالعان ءسابيدى دارىگەرلەر «ەرەكشە بالاقاي» دەيدى. ويتكەنى سول قۇلاعىندا بەلگى بار. مۇنداي بەلگىمەن تۋاتىن نارەستەلەر سيرەك كەزدەسەدى. سوندىقتان، دارىگەرلەر قىز بالاعا ارتۋعاي دەگەن ەسىم بەرىپتى.

وسىلايشا كوشەدەن تابىلعان تاستاندى بالا مۇنداعى دارىگەرلەردىڭ كوزايىمىنا اينالعان. «تۇسكەن كەزدە جاعدايى اۋىر ەدى. ويتكەنى دەنەسى قاتتى سۋىقتاپ قالعان، مەرزىمىنە جەتكەن بەلگىلەرمەن كەلگەن. سالماعى 3 كەلى 888 گرام، بويى - 52 س م. انتيبيوتيكتەر سالدىق، دەنە قىزۋى بىرتىندەپ ءتۇستى. قازىرگى جاعدايى ورتاشا»، - دەيدى نارەستەلەر بولىمشەسىنىڭ مەڭگەرۋشىسى نۇرسۇلۋ كەنجەبەكوۆا.

اۋىل تۇرعىندارىنىڭ پايىمداۋىنشا، كوكەك انا بالانى ادەيى وسى جەرگە تاستاپ كەتكەن. ويتكەنى بۇل كوشە ۇلكەن ءارى ادامدار ۇزىلمەيدى. سول كۇنگى وقيعا ورنىندا ءالى كۇنگە دەيىن قان ىزدەرى جاتىر. تاستاندى بالانى العاش كورگەن جان - گۇلميرا سەرىكبايەۆا.

ول 4 -ناۋرىز كۇنى مەكتەپكە جۇمىسقا بارا جاتقان كەزدە ءۇيىنىڭ ماڭىنداعى ارىقتان جىلاعان بالانىڭ داۋىسىن ەستىپتى. جۇگىرىپ بارسا، قىتايلىق سومكەنىڭ ىشىندە جاڭادان تۋعان نارەستە جاتىر ەكەن. كىندىگى كەسىلمەگەن بالاقايدىڭ دەنەسىنىڭ توڭىپ قالعانىن بايقاعان گۇلميرا ويلانباستان العاشقى كومەك كورسەتكەن.

«بالانىڭ كىندىگى كەسىلمەگەن، جاۋراپ قالعان. سوسىن سومكەدەن شىعارىپ، دەنەسىن كۇنگە توسا قويدىم. سودان جەدەل جاردەم كەلدى. العاشقى كومەكتى كورسەتتى. بالانىڭ كىندىگىن كەستى. توڭىپ قالعانىنا قاراعاندا اناسى ءبىر- ەكى ساعات بۇرىن بوسانعان سياقتى»، - كىتاپحاناشى گۇلميرا سەرىكبايەۆا.

بالانى كەزدەيسوق تاۋىپ العان ول تاستاندى قىزدى اسىراپ العىسى كەلەدى. ويتكەنى «تاعدىردىڭ جازۋىمەن شاقالاقتىڭ ارى قاراي ءومىر سۇرۋىنە سەبەپشى بولعىم كەلەدى» دەيدى. ءبىراق، بۇل بالاقايدىڭ اتا-اناسى كىم بولارى ءالى بەلگىسىز. دەگەنمەن، قازىردىڭ وزىندە ءسابيدى اسىراپ الۋعا نيەت ەتكەندەر كوپ. ال قۇزىرلى ورگان وكىلدەرى ايدىڭ-كۇننىڭ امانىندا تۋعان بالاسىن دالاعا تاستاپ كەتكەن كوكەك انانى ىزدەستىرۋدە.

اۆتور: ەربول جانات