تەرگەۋشىلەر وڭتۇستىك كورەيا پرەزيدەنتىنە تاعىلعان ايىپتى راستادى

استانا. قازاقپارات - تەرگەۋشىلەر وڭتۇستىك كورەيا پرەزيدەنتى پاك كىن حەنىڭ جاقىن قۇربىسى ءارى كەڭەسشىسى چحۆە سۋن سيلمەن بىرگە پارا العانىن راستادى.

ولار Samsung كومپانياسىنىڭ ۆيتسە- پرەزيدەنتى لي چجە يەنگە ىسكەرلىك ماسەلەلەرىن شەشۋگە كومەكتەسپەك بولعان.

تەرگەۋ كوميسسياسىنىڭ دەرەگىنە سۇيەنسەك، ولار Samsung كومپانياسىنان 120 ميلليون دوللارعا جۋىق پارا العان. سونداي-اق تەرگەۋشىلەر چحۆەنىڭ وتباسىندا قۇنى 236 ميلليون دوللار بولاتىن اكتيۆتەر بارىن انىقتاعان.

«تەرگەۋ بەل ورتاسىنا جەتتى. بۇل جوسپاردىڭ جارتىسى. ۋاقىتشا شەكتەۋلەر مەن كۇدىكتىلەردىڭ تەرگەۋشىلەرگە كومەك كورسەتپەۋىنە بايلانىستى تەجەلىپ تۇر» - دەيدى تەرگەۋ كوميسسياسىنىڭ وكىلى.

پرەزيدەنت پاك كىن حە لي چجە ەننىڭ مۇددەسىن قورعاۋ ءۇشىن وكىلەتتىگىن اسىرا پايدالانعان. Samsung-پەن بايلانىستى ەكى كومپانيانىڭ بىرىگۋى ءۇشىن ۇكىمەتتىك داۋىس بەرۋدى بۇرمالاعان. ولاي ىستەمەگەن جاعدايدا كومپانيا ۇلكەن شىعىندارعا ۇشىراۋى مۇمكىن بولعان.

بۇدان بولەك، وڭتۇستىك كورەيا ۇكىمەتىن سىناعان مادەنيەت قىزمەتكەرلەرىنىڭ «قارا ءتىزىمىن» جاسادى دەپ ايىپ تاعىلىپ وتىر.

سونىمەن قاتار پاك كىن حە مەن چحۆە سۋن سيل بوتەن ادامداردىڭ اتىنا تىركەلگەن ۇيالى تەلەفونداردى زاڭسىز پايدالاندى دەگەن كۇدىككە دە ىلىنگەن. پاك كىن حە مەن چحۆە سۋن سيلگە سيم- كارتالار ساتىپ العان كومەكشىگە دە ايىپ تاعىلعان.

قۇجات بويىنشا پاك كىن حە ءالى دە پرەزيدەنت لاۋازىمىندا. ءبىراق جەلتوقساندا پارلامەنت ونى تاقتان تايدىرۋ ءۇشىن يمپيچمەنتكە داۋىس بەرگەن بولاتىن.

تەرگەۋ كوميسسياسى ءىس ماتەريالدارىن جاقىن ارادا پروكۋراتۋراعا بەرۋى كەرەك.

لي چجە يەن اقپان ايىنىڭ ورتاسىندا «پارا بەرۋ» بابى بويىنشا تۇتقىندالدى.

 

دەرەككوز: http://www.bbc.com/russian