قازاقستان مەن اۋعانستان باسشىلارى اراداعى تاۋار اينالىمىنىڭ ارتقانىن اتاپ ءوتتى
اڭگىمە بارىسىندا تاراپتار ەكىجاقتى قارىم- قاتىناستىڭ قازىرگى جاعدايى مەن پەرسپەكتيۆالارىن تالقىلادى.
كوشباسشىلار اۋعانستان پرەزيدەنتىنىڭ قازاقستانعا 2015 -جىلعى قاراشاداعى رەسمي ساپارىنىڭ قورىتىندىسى بويىنشا قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىنا كوڭىلدەرى تولاتىنىن جەتكىزدى.
اتاپ ايتقاندا، سوڭعى ۋاقىتتا ءوزارا تاۋار اينالىمىنىڭ كولەمى ايتارلىقتاي ارتقانى بايقالىپ وتىر. ەكى ەلدىڭ باسشىلارى بيىلعى 12- اقپاندا قازاقستان مەن اۋعانستان اراسىندا ديپلوماتيالىق قارىم- قاتىناس ورناعانىنا 25 جىل تولۋىنا وراي ءبىرىن- ءبىرى قۇتتىقتادى. سونداي- اق، تاراپتار قازاقستان رەسپۋبليكاسىنىڭ ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە اۋعانستان جونىندەگى كوميتەتتىڭ ءتوراعاسى ەكەنىن ەسكەرىپ، اۋعانستانداعى احۋالدى تالقىلادى.
اۋعانستان پرەزيدەنتى بيىل استانادا وتەتىن شاڭحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسى وتىرىسىنا، يسلام ىنتىماقتاستىق ۇيىمىنىڭ عىلىم جانە تەحنولوگيالار جونىندەگى سامميتىنە قاتىساتىنىن راستادى. تەلەفون ارقىلى سويلەسۋگە اۋعانستان جاعى باستاماشى بولدى.
