دەپۋتاتتار استانانىڭ بيۋدجەتىن كوبەيتۋدى ۇسىندى

استانا. قازاقپارات - ەلوردا ءماسليحاتىنىڭ كەزەكتەن تىس سەسسياسىندا قارجى جىلىنىڭ باسىنداعى ەركىن قالدىقتاردى ءبولۋ ماسەلەسى قارالدى.

بۇل تۋرالى قالا اكىمدىگىنىڭ رەسمي سايتىندا ءمالىم ەتىلدى. سەسسيا جۇمىسىنا قالا اكىمىنىڭ ورىنباسارى اندرەي لۋكين، قالا اۋداندارىنىڭ اكىمدەرى، قالالىق دەپارتامەنتتەر مەن باسقارمالاردىڭ جەتەكشىلەرى، قوعامدىق بىرلەستىكتەردىڭ جانە بۇقارالىق اقپارات قۇرالدارىنىڭ وكىلدەرى قاتىستى.

استانا قالاسىنىڭ 2017-2019-جىلدارعا ارنالعان بيۋدجەتىنە وزگەرتۋلەر مەن تولىقتىرۋلار ەنگىزۋ تۋرالى باياندامامەن استانا قالاسى اكىمىنىڭ ورىنباسارى اندرەي لۋكين ءسوز سويلەدى. قالانىڭ نەگىزگى الەۋمەتتىك-ەكونوميكالىق كورسەتكىشتەرىنىڭ وسىمىنە سايكەس ناقتىلاۋ كەزىندە بيۋدجەتتىڭ كىرىس بولىگىن 11,0 ميلليارد تەڭگەگە ۇلعايتۋ كوزدەلگەن. سونىمەن بىرگە، رەسپۋبليكالىق بيۋدجەتتى ناقتىلاۋ شەڭبەرىندە 77,5 ميلليارد تەڭگە كولەمىندە ترانسفەرتتەر قوسىمشا ءبولىندى، دەپ ءمالىم ەتتى اكىمنىڭ ورىنباسارى.

سونداي-اق، بيۋدجەت قارجىسىن يگەرۋ مونيتورينگى ناتيجەلەرىنىڭ نەگىزىندە شىعىستاردى ىشكى قايتا ءبولۋ جۇرگىزىلدى، ول قارجى ەلوردانى دامىتۋ بويىنشا ءبىرقاتار مىندەتتەردى شەشۋگە باعىتتالادى.

اتاپ ايتقاندا، سۋ تاسقىندارىنا قارسى شارالارعا، كوشەلەردى مەحانيكالاندىرىلعان جيناۋ جۇمىستارىنا، جەڭىلدەتىلگەن ءدارى-دارمەكپەن قامتاماسىز ەتۋگە، دەنساۋلىق ساقتاۋ نىساندارىن جىلۋمەن قامتۋعا، وقۋلىقتار مەن وقۋ-ادىستەمەلىك كەشەندى ساتىپ الۋعا، ەكسپو-2017 كورمەسىنە ەرىكتىلەردى دايىنداۋعا، اپاتتى جانە ەسكى ۇيلەردى بۇزۋعا، ينۆەستيتسيالىق جوبالاردى ىسكە اسىرۋعا قارجى قاراستىرىلعان.

تالقىلاۋ بارىسىندا دەپۋتاتتار «سارى ارقا» اۋدانىنىڭ ىشكى ىستەر باسقارماسى ءۇشىن عيمارات سالۋ، قۇقىق قورعاۋ ورگاندارىنىڭ قىزمەتكەرلەرىن باسپانامەن قامتۋ، مەكتەپ جانە مەكتەپكە دەيىنگى مەكەمەلەردىڭ اۋماقتارىن قاردان تازالاۋعا قارجى ءبولۋ ماسەلەلەرىن كوتەردى.

ەكونوميكا جانە بيۋدجەتتىك جوسپارلاۋ باسقارماسىنىڭ جەتەكشىسى ءاليبي جۇمايەۆ دەپۋتاتتارىنىڭ قاراۋىنا «2016-2018-جىلدارى ىسكە اسىرۋعا جوسپارلانعان مەملەكەتتىك- جەكە-مەنشىك ارىپتەستىك جوبالارىنىڭ ءتىزىمى تۋرالى» ماسەلەنى شىعاردى.

اكىمدىكتىڭ وكىمىمەن 10 بالاباقشا ەنگىزىلگەن جوبالاردىڭ ءتىزىمى ماقۇلداندى. قاجەت پروتسەدۋرالاردان ءوتىپ، كەلىسىم-شارتتارعا قول قويىلعان سوڭ الەۋەتتى ينۆەستورلار جوعارىدا اتالعان نىسانداردىڭ قۇرىلىسىنا كىرىسەدى، دەپ ءمالىم ەتتى ءا. جۇمايەۆ.

سونداي-اق، استانا قالاسى ءماسليحاتىنىڭ شەشىمىمەن مەملەكەتتىڭ قاجەتتىلىكتەرىنە جەر تەلىمدەرىن الۋعا بايلانىستى جەر تەلىمدەرىن نەمەسە باسقا جىلجىمايتىن مۇلىكتى ساتىپ الۋ تۋرالى كەلىسىمشارتتاردىڭ جوباسى كەلىسىلدى، استانا قالاسىندا قۇقىق بۇزۋشىلىقتاردىڭ الدىن الۋ بويىنشا ۆەدومستۆوارالىق كوميسسيانىڭ، استانا قالاسىندا جەر تەلىمدەرىنە قۇقىقتار بەرۋ كوميسسياسىنىڭ، استانا قالاسى اكىمدىگىنىڭ جانىنداعى 2020-جىلعا دەيىن وڭىرلەردى دامىتۋ باعدارلاماسى شەڭبەرىندە اپاتتى ۇيلەردى بۇزۋ بويىنشا پيلوتتىق جوبانى ىسكە اسىرۋ بويىنشا تۇرعىن ءۇي كوميسسياسىنىڭ قۇرامدارى بەكىتىلدى.