بوكستان قازاقستان ۇلتتىق قۇراماسى گەرمانيادا ءجۇر
بۇل تۋرالى باس باپكەر مىرزاعالي ايتجانوۆ قازاقپارات تىلشىسىنە بەرگەن شاعىن سۇحباتىندا ءمالىم ەتتى.
«ءبىز كەشە، جەكسەنبى كۇنى گەرمانياعا ۇشىپ كەلدىك. قازاقشا ايتقاندا، «ءيت تۇمسىعى وتپەيتىن نۋ ورمان» اراسىندا ورنالاسقان بازاعا كەلىپ جايعاستىق. باستى ماقساتىمىز - بىرىككەن وقۋ-جاتتىعۋ جۇمىستارىن جۇرگىزۋ. قازىر اۋا رايى مەن ۋاقىت ايىرماشىلىعىنا بەيىمدەلىپ جاتىرمىز. جالپى گەرمانياعا 15 بوكسشى الىپ كەلگەن بولاتىنمىن. ونىڭ 10 ى وسىندا وتەتىن تۋرنيرگە قاتىسادى. ال بەسەۋى جاقىندا فينليانديا ەلىندە وتەتىن تاعى ءبىر تۋرنيرگە اتتانادى. ال قالعان جىگىتتەر الماتىداعى AIBA اكادەمياسىندا جاتتىعىپ جاتىر. ولاردىڭ ىشىنەن التى بوكسشىمىز باكۋدە وتەتىن «جىبەك جولى» تۋرنيرىنە قاتىسادى، - دەپ اتاپ ءوتتى باس باپكەر.
ەستەرىڭىزگە سالا كەتەيىك، وسىدان ءبىراز ۋاقىت بۇرىن قازاقستان قۇراماسى الماتىدا ا ق ش جانە گەرمانيا بوكسشىلارىمەن بىرلەسكەن وقۋ-جاتتىعۋ جيىندارىن وتكىزگەن بولاتىن.
اۆتور: كۇنسۇلتان وتارباي
