الەۋمەتتىك جەلىدە سىنالعان دەپۋتات جەلىدەگى مازاق ۆيدەولار مەن مەمدەردىڭ كوڭىلگە تيگەنىن ايتتى
«قانشا ادام بولسا، سونشا پىكىر بولادى، بىزدە ءتۇسىنۋ بولۋى كەرەك. ال جەكە باسىن قورلاۋ - ءاربىر ادامنىڭ ءوز دەڭگەيى. مەن ەكى مارتە ءماسليحات دەپۋتاتى بولىپ سايلاندىم، قازىر ماجىلىستەمىن. سىزدەر دە قان مەن ەتتەن جارالعانسىزدار. ارينە، جاعىمسىز بولدى، كوڭىلگە ءتيدى. حالىق مەنى نەگە تۇسىنبەدى. «جاستىققا كوز جاسىمدى مالىدىم» نەمەسە رەنجىپ قالدىم دەپ ايتا المايمىن. تۇسىنبەگەندىكتەن ءبىرتۇرلى سەزىمدە بولدىم. ءبىراق ۋاقىت وتە كەلە ۇمىتىلار دەپ ەسەپتەيمىن»، - دەپ پىكىر ءبىلدىردى حامەنوۆا.
دەپۋتات پارلامەنت پالاتالاتىنىڭ بىرىككەن وتىرىسىندا شىن جۇرەكتەن سويلەگەنىن ايتادى. «مەن ەلباسىنى سۇيەمىن. «مەن پرەزيدەنتپەن «كوزىمدى اشتىم». مەن تاۋەلسىز قازاقستاننىڭ ۇرپاعىمىن. پرەزيدەنتكە جۇرەكجاردى ءسوزىمدى نەگە ايتا المايمىن؟ اركىمنىڭ ءوز پىكىرى بار، ەشكىمگە وزگەشە ويلاۋعا تىيىم سالا المايمىز. ارينە، وڭىرلەردە شەشىلمەگەن ماسەلەلەر بار دەپ جاتىر. حالىق نارازى، ءبىراق مۇنىڭ بارلىعىنا دا پرەزيدەنتتىڭ كىناسى دەۋگە بولمايدى عوي. دەپۋتاتتار دا كىنالى. ءار ءوڭىردىڭ ءوز باسشىسى بار. وسىعان جاۋاپتى ادامدار بار. اكىمى بار»، - دەدى ول.
ەسكە سالايىق، 3 -ناۋرىزدا ءماجىلىس دەپۋتاتى باقىتگۇل حامەنوۆا باستى زاڭدا تۇڭعىش پرەزيدەنتتىڭ باعا جەتپەس ءرولىن كورسەتۋ قاجەت دەپ مالىمدەگەن ەدى. ول كونستيتۋتسيانىڭ 91-بابىنىڭ 2-پۋنكتىندە مىزعىماس قۇندىلىقتارىنا ەلدىڭ مەملەكەتتىك تاۋەلسىزدىگىن عانا ەمەس، قازاقستان تاۋەلسىزدىگىنىڭ نەگىزىن قالاۋشى، كوشباسشى ءارى نەگىزىن قۇرۋشى ۇستانىمدارى مەن ستاتۋسىن ەنگىزۋ كەرەك ەكەنىن ايتقان.
«كونستيتۋتسيالىق رەفورمانىڭ جوباسىن بۇكىلحالىقتىق تالقىلاۋ بارىسىندا سايلاۋشىلارىمىز وسى باستامالاردى قولدادى. تۇڭعىش پرەزيدەنتتىڭ ەسىمىن استانا حالىقارالىق اۋەجايىنا، تاعى دا باسقا نىساندار مەن كاسىپورىندارعا بەرۋ تۋرالى ۇسىنىستار ايتىلدى»، - دەگەن ەدى دەپۋتات ءبىرىنشى بىرىككەن وتىرىستا.
وسىدان كەيىن الەۋمەتتىك جەلى قولدانۋشىلارى دەپۋتاتتىڭ بۇل سوزىنە مازاق، ءازىل، كۇلكى قوسىپ، مەمدەر مەن روليكتەر جاساي باستادى. ال بۇعان دەيىن باقىتگۇل حامەنوۆا استانانى ەلباسى قالاسى دەپ اتايىق دەگەن ۇسىنىس ايتقان.
