ىشكى ىستەر ءمينيسترىن تاعايىنداۋ وكىلەتتىگى پرەزيدەنت قۇزىرەتىندە قالدى
«ىشكى ىستەر ءمينيسترىن تاعايىنداۋ جانە قىزمەتىنەن بوساتۋ پرەزيدەنتتىڭ جەكە قۇقىعىندا بولسىن دەگەن ۇسىنىس كوتەرىلگەن ەدى. بۇل جايىندا ءبىز جازباشا دا ۇسىنىس الدىق. ونى قاراستىردىق جانە ۇسىنىسپەن كەلىستىك. سەبەبى، بىرىنشىدەن، ىشكى ىستەر ءمينيسترى مەملەكەتتەگى قوعامدىق قاۋىپسىزدىك ءۇشىن، ازاماتتاردىڭ جەكە باسىنىڭ قاۋىپسىزدىگىنە جاۋاپ بەرەدى»، - دەدى پارلامەنت پالاتالارىنىڭ وتىرىسىنان كەيىن ب ا ق وكىلدەرىنە سۇحبات بەرگەن ءماجىلىس دەپۋتاتى، كونستيتۋتسيالىق رەفورما جونىندەگى زاڭ جوباسىن ەكىنشى وقىلىمعا دايىنداۋ جونىندەگى بىرلەسكەن كوميسسيا ءتوراعاسى نۇرلان ءابدىروۆ.
سونىمەن قاتار ونىڭ ايتۋىنشا، ەلباسى - قازاقستان رەسپۋبليكاسىنىڭ پرەزيدەنتى ءوزىنىڭ جوعارى مارتەبەلى لاۋازىمىنا بايلانىستى ق ر قارۋلى كۇشتەرىنىڭ جوعارعى باس قولباسشىسى بولىپ سانالادى.
«ال ىشكى ىستەر مينيسترلىگىنىڭ قۇرامىندا ۇلتتىق گۆارديا بار. ول تىكەلەي اسكەري مەكەمە. سول سەبەپتى قولدادىق. سوندىقتان بۇگىنگى تاڭدا ەلباسىنىڭ جەكە قۇقىمەن تاعايىندالاتىن جانە قىزمەتىنەن بوساتىلاتىن ىشكى ىستەر ءمينيسترى وسى تارتىپپەن قالا بەرەدى. قورعانىس تا، سىرتقى ىستەر ءمينيسترى دە. ال ادىلەت ءمينيسترىن بەكىتۋ جانە قىزمەتىنەن بوساتۋ پارلامەنتكە بەرىلەدى»، - دەدى ءماجىلىس دەپۋتاتى.
ايتا كەتەيىك، بۇگىن ق ر پارلامەنتى پالاتالارىنىڭ بىرلەسكەن وتىرىسىندا «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» ق ر زاڭى قابىلدانعان بولاتىن.
