سولتۇستىك كورەيا زىمىراندارى جاپونيانىڭ ايرىقشا ەكونوميكالىق ايماعىنا قۇلادى

بۇل تۋرالى ت ا س س اگەنتتىگىنە دۇيسەنبى، 6- ناۋرىز كۇنى جاپونيا مينيسترلەر كابينەتىنىڭ باس حاتشىسى ەسيحيدە سۋگا ءمالىم ەتتى. سولتۇستىك كورەيالىق زىمىرانداردىڭ سىناقتارى سالدارىنان جاپونياعا كەلگەن شىعىندار تۋرالى اقپارات جوق، دەپ اتاپ ءوتتى جاپوندىق مينيسترلەر كابينەتىنىڭ وكىلى.

جاپونيانىڭ پرەمەر-ءمينيسترى سيندزو ابە پحەنياننىڭ ارەكەتىن سىنعا الدى. «بۇل ەلىمىزدىڭ قاۋىپسىزدىگى ءۇشىن قاتەرلى قاۋىپ جانە ءبىز سولتۇستىك كورەيانىڭ مۇنداي ارەكەتتەرىن ءۇزىلدى-كەسىلدى سىنعا الامىز»، - دەدى ول.

قازىرگى ۋاقىتتا سەۋل ۇشىرىلىمدار بويىنشا اقپاراتتاردى ناقتىلاۋمەن اينالىسۋدا. سولتۇستىك كورەيا 6- ناۋرىز كۇنى جەرگىلىكتى ۋاقىت بويىنشا 07:36-دا پحەنان-پۋكتو پروۆينتسياسىنان بەلگىسىز ۇلگىدەگى زىمىرانداردى ۇشىردى.

بولجام بويىنشا، KN-08 نەمەسە KN-14 قۇرلىقارالىق بالليستيكالىق زىمىرانىن سىناقتان وتكىزۋ جۇرگىزىلگەن. بۇل رەتتە، وڭتۇستىك كورەيادا ءىرى اۋقىمداعى كورەيا- امەريكالىق اسكەري جاتتىعۋلار ءوتىپ جاتقان.

ەسكە سالساق، پحەنيان بۇعان دەيىن بالليستيكالىق زىمىراندى 12- اقپان كۇنى ۇشىرعان بولاتىن. ەلدىڭ بۇل ارەكەتىن ب ۇ ۇ قاۋىپسىزدىك كەڭەسى سىنعا الدى. ال ك ح د ر ۇشىرىلىمدار ءساتتى وتكەنىن ءمالىم ەتتى.

اۆتور: ميرا تولەندى قىزى