مۇحتار شاحانوۆ: ولەڭ وقۋ، بۇل ءان ايتۋ سياقتى وزىنشە ونەر
ەل اعاسىنىڭ مەرەيتويى قارساڭىندا بۇگىن الماتى وبلىسى، تالعار قالاسىنداعى «اگروبيزنەس جانە مەنەدجمەنت كوللەدجىندە» رەسپۋبليكالىق «مۇحتار شاحانوۆ وقۋلارى» ۇيىمداستىرىلدى. پوەزيا كەشىنە اۋداندار مەن قالا مەكتەپتەرىنىڭ شاكىرتتەرى قاتىسىپ، قايراتكەر قالامگەردىڭ شىعارمالارىن دارىپتەپ، ءوزارا سىنعا ءتۇستى.
تار زاماننىڭ تايعاق كەشۋلەرىندە جالىندى جىرلارىمەن كۇركىرەپ شىققان مۇحتار شاحانوۆ قازاققا پاتريوتتىق رۋحقا تولى ولەڭدەرىمەن باعالى. جىر سۇيەر قاۋىم بۇگىن تارلانبوز اقىننىڭ ەل اراسىندا كوپ تارالعان ويلى شۋماقتارىنا تاعى ءبىر ساياحات جاسادى. ولەڭ مەرەكەسىنە 8 بەن 16 جاس ارالىعىنداعى 140 قا جۋىق مەكتەپ وقۋشىسى قاتىستى.
«بالالار «جىگەرسىزدەنۋ»، «ءتورت اناعا» دايىندالىپ كەلگەن جانە اعامىزدىڭ «كونتسەپتسياسىنا» كوپ دايىندالعان»، - دەيدى م. شاحانوۆ پوەزيالىق كلۋبىنىڭ ءتورايىمى زامزاگۇل اۋباكىر.
«جالىن» جۋرنالىندا اقىنمەن بىرگە قىزمەت ىستەپ جۇرگەن ارىپتەستەرى اق مارجانداي شاشىلعان جىر شۋماقتارىن سارالاپ، ورىندالۋ مانەرىنە قازىلىق ەتتى. ال قايراتكەر اقىننىڭ ءوزى قارا ءسوزدى جاتتاپ الىپ، مانەرلەپ وقۋدان بولەك ۇرپاق بويىنا سونىڭ ماعىناسىن جەتە ۇعىندىرىپ، اسقاق رۋح دارىتا بىلسەك - سول باعالى - دەيدى.
«ولەڭ وقۋ، بۇل ءان ايتۋ سياقتى، ودان دا كۇردەلى وزىنشە ونەر. ونىڭ ىشىندە جاقسى وقىپ جاتقان بالالار بار، نيەتى بار، كوڭىلى بار، بارلىعى دۇرىس، ءبىراق ءبىر ولەڭنىڭ ىشىندە ۇلكەن وقيعالار، ءارتۇرلى يدەيالار بەرىلەدى عوي، سونى ءتۇسىنۋدىڭ ءوزى جاقسى»، - دەيدى اقىن مۇحتار شاحانوۆ.
زاڭعار تۇلعا تالاي سىرلى اڭگىمەلەردىڭ تيەگىن اعىتىپ، وزىندىك وي-تالعامىمەن ساباقتاستىرا وقۋشىلارمەن ەمەن-جارقىن اڭگىمە قۇردى. شاحانوۆ بۇگىنگى كۇنى ءسوزى مەن ءىسى بولەك، شىندىعىنان اداسقان، ۇلتتىق مۇددەگە كەلگەندە قۇلشىنىسى كەدەي ادامداردىڭ كوبەيىپ كەتكەندىگىن ايتىپ، ۇستازدارعا ونەردىڭ ورەلى جاناشىرلارى، وسكەلەڭ ۇرپاقتى پاراسات بيىكتىگىندە تاربيەلەپ، سانالى ەتىپ ءوسىرۋدى امانات ەتىپ تاپسىردى.
31-ارنا
