ديماشتىڭ دومبىرامەن كورسەتكەن ونەرى قىتايلىق كورەرمەندى ءتانتى ەتتى –فوتو، كەسكىن

 استانا. قازاقپارات - حۋنان تەلەارناسىنىڭ ءان بايقاۋىنىڭ جەتىنشى كەزەڭى ەفيردەن كورسەتىلدى، دەپ حابارلايدى قازاقپارات.

جوباعا قاتىسىپ جاتقان قازاقستاندىق ءانشى ديماش قۇدايبەرگەن بۇل كەزەڭدە ءبىرىنشى بولىپ ونەر كورسەتىپ، قازاق ۇلتتىق مۋزىكا اسپاپتار وركەسترىنىڭ سۇيەمەلدەۋىمەن «دايديداۋ» ءانىن شىرقادى.

ايتە كەتەرلىگى، ديماشتىڭ قازاقتىڭ ۇلتتىق مۋزىكا اسپابى - دومبىرادا كورسەتكەن ونەرى قىتايلىق كورەرمەندەردى ءتانتى ەتتى. سونداي-اق، قازاقستاندىق ءانشى التىنشى كەزەڭدە «Adagio»ءانىن ايتقاندا پيانينودا ويناعان بولاتىن.

جەتىنشى كەزەڭنىڭ قورىتىندىسى بويىنشا باس جۇلدەنى گونگوك تۋماسى Sandy جەڭىپ الدى. جوباعا جاڭا عانا قوسىلعان قىتايلىق ءانشى لي تسيان ەكىنشى ورىننان كورىنسە، چجان بيچجەن جوبادان شىعىپ قالدى.

جوبانىڭ ىرىكتەۋ باسەكەسىنىڭ ءتورت اينالىمى (8 كەزەڭى) ءوز مارەسىنە جەتتى. جوباعا قاتىسۋشى باستاپقى جەتى انشىدەن تەك ءۇش ادام قالدى. الدا تەك ەكى كەزەڭ بار. ەسكە سالا كەتەيىك، سەگىزىنشى كەزەڭدە ديماش تاماعىنىڭ اۋىرۋىنا قاراماي، قىتايشا «تاڭ اتتى» ءانىن ورىنداپ شىقتى. ءتورتىنشى اينالىمنىڭ (جەتىنشى جانە سەگىزىنشى كەزەڭ) قورىتىندىسى بويىنشا ديماش جالپى ەسەپتە بەسىنشى ورىنعا تۇراقتادى.