مينيستر اتامقۇلوۆ اپاتتار كەزىندە بەلگى بەرۋ قۇرىلعىسىن تەكسەردى
عارىش تەحنيكاسى جانە تەحنولوگيا ينستيتۋىنىڭ ماماندارى ءمينيستردى ەۆاك جۇيەسىنىڭ مۇمكىندىكتەرىمەن تانىستىردى.
«ەۆاك جۇيەسى اپات كەزىندە شۇعىل ارەكەت ەتۋ قىزمەت وكىلدەرىنە 20 سەكۋندتىڭ ىشىندە حابار بەرە الادى. بۇل قيىن جاعدايدا قالعان ادامدارعا كومەك كورسەتۋدە، اسىرەسە جەدەل مەديتسينالىق كومەك قاجەت بولعان كەزدە ەرەكشە ماڭىزدى. وقيعا كەزىندە بەرىلگەن حابار دەرەكتەردى وڭدەۋ ورتالىعىنا تۇسەدى. ول اپات ورىن العان جەردىڭ باعىتىن اۆتوماتتى تۇردە انىقتاپ، قانداي كولىكتىڭ جول وقيعاسىنا تاپ بولعاندىعىن بىلۋگە مۇمكىندىك بەرەدى»، - دەدى عارىشتىق اقپاراتتىق تەحنولوگيالار زەرتحاناسىنىڭ مەڭگەرۋشىسى دەنيس ەريمين. حابار ورتالىقتان ەۆاك جۇيەسىنىڭ وپەراتورىنا تۇسەدى.
ول ناقتى ۋاقىت رەجيمىندە حابار بەرگەن تاراپپەن بىردەن بايلانىسقا ءتۇسىپ، ول جەرگە جەدەل جاردەم سياقتى وزگە دە قىزمەت تۇرلەرىنىڭ قاجەت نەمەسە قاجەت ەمەستىگىن جانە بولعان وقيعادان قانشا ادام زارداپ شەككەندىگىن اينىقتاي الادى. بۇدان ءارى حابار توتەنشە جاعدايلار قىزمەتىنە جىبەرىلەدى. جۇيەنىڭ تاعى ءبىر ارتىقشىلىعى - ونىڭ كەدەن وداعىنا قاتىسۋشى ەلدەردىڭ وسىنداي جۇيەلەرىمەن ينتەگراتسيالانۋ مۇمكىندىگى. بۇدان بۇرىن حابارلانعانداي، ەۆاك جۇيەسىن ەنگىزۋ ماسەلەلەرىنە قازاقستاندىق كاسىپكەرلەر قىزىعۋشىلىق تانىتتى. ولار «اتامەكەن» ۇكپ- مەن بىرگە ۇلتتىق عارىش ورتالىعىنا باردى. قورعانىس جانە ايروعارىشتىق ونەركاسىپ ءمينيسترى اتامقۇلوۆقا «ەلەكتروندى بىلەزىك» رەتىندە بەلگىلى باقىلاۋعا الىنعان تۇلعالاردىڭ ەلەكتروندىق مونيتورينگى جۇيەسى كورسەتىلدى.
