تانىمال گەرمانيالىق سپورتشى قازاق جەرىندە دۇنيەگە كەلگەنىن ماقتان تۇتادى
گەرمانيالىق ينا مەنتسەر - كۇللى ەۋروپا ەلدەرىنە تانىمال سپورتشى. ءبىراق ونىڭ قازاقستاندىق ەكەنىن ءبىرى بىلسە، ءبىرى بىلە بەرمەيدى. بوكستىڭ ءۇش بىردەي نۇسقاسىندا الەم چەمپيونى اتانعان ول بۇگىندە گامبۋرگدا جاتتىقتىرۋشى بولىپ جۇمىس ىستەپ ءجۇر. الايدا ارقا تورىندە، اتباسار جەرىندە تۋعانىن ماقتان تۇتاتىن ينا قازاقتىڭ دارحان دالاسىن استە ەستەن شىعارعان ەمەس.
قىرعىنعا تولى قىرىقىنشى جىلدارى، دەپورتاتسيالاۋ كەزىندە اتاسى مەن اجەسى وسىندا كەلگەن. ولار دا مىڭداعان نەمىستەر سياقتى قازاق حالقىنىڭ كەڭ پەيىلى مەن باۋىرمالدىعى ارقاسىندا امان قالدى. قازىر تاريحي وتانى گەرمانيادا تۇراتىن مەنسەر اۋلەتى قازاقستانعا ءدان ريزاشىلىق ءبىلدىرىپ، ۇدايى ەسكە الادى. ال ۇستەل ۇستىندە ءارقاشاندا ءبىزدىڭ ۇلتتىق تاعامدارىمىزدىڭ ەلدەن ەرەك ءدامدى ەكەنىن ايتادى.
ينا مەنسەر، سپورتشى:
- مەنىڭ اتام مەن اجەم دەپورتاتسيا كەزىندە نەبارى 5-6 جاستا بولدى جانە ءبىزدى قازاقتار جاقسى قابىلدادى دەيدى. قيىن- قىستاۋ كەزەڭ تىم اۋىر بولدى، الايدا قامقورلىق جاساعان حالىقتىڭ ارقاسىندا اۋزىمىز اققا جارىپ، اياققا تۇردىق. اتا- انامنىڭ ۇيىنە قوناققا بارعاندا، ولار ىلعي نە دايىنداۋ كەرەكتىگىن سۇرايدى. ال ءبىز مانتى نەمەسە بەشبارماق جاساۋىن وتىنەمىز. جادىمدا قازاقستان جايلى تەك جاقسى اسەر، ىزگى ويلار جاتتالىپ قالدى. سوندىقتان قازاقستان حالقىنىڭ گۇلدەنە بەرۋىن جانە باقىتتى بولۋىن تىلەيمىن. قازاقستانعا سالەم جانە العىس ايتۋ كۇنى قۇتتى بولسىن!
قازاقستاندى ۆيللي مۋنتانيول دا جان- جۇرەگىمەن جاقسى كورەدى. جازۋشى- جۋرناليست، ءارى سازگەر ۆيللي ساعىم جىلداردى ساعىنىشپەن ەسكە الادى. كەزىندە نەمىس وتباسىلارىن اقتوبەدەگى اۋىلدارعا قونىس اۋداردى. تار جول، تايعاق كەشۋدە تارىققان تۋعان- تۋىستارىنا قازاقتار قاراسىپ، كوپ كومەك بەردى. ول گەرمانيا مەن قازاقستاننىڭ دوستىعىنىڭ ماڭگى جاساي بەرەتىنىنە بەك سەنىمدى. قازاقستان حالقى اسسامبلەياسىنىڭ العاشقى سەسسياسىنا قاتىسقان ۆيللي پرەزيدەنت نۇرسۇلتان نازاربايەۆپەن كەزدەسكەنىن دە ماقتانىشپەن ايتادى. كوپتەن كورمەگەن ۇلى دالانى ۇلىقتاپ، وسكەن ولكەسى - اقتوبەگە دەگەن ساۋمال ساعىنىشتى ولەڭمەن ءورىپ ءجۇر.
ۆيللي مۋنتانيول، جازۋشى:
- اعام ەكەۋىمىز سۇيىكتى شاھارىمىزعا ارناپ «مەنىڭ قالام - اقتوبە» اتتى ءان شىعاردىق. بۇل تۋىندى قالانىڭ ءانۇرانىنا اينالىپ كەتتى. ەگەر نەمىستەر قازاق اندەرىن كوزىنە جاس الىپ تىڭداسا، ءبىزدىڭ جات ەمەستىگىمىزدى دالەلدەۋدىڭ ءوزى ارتىق. ءبىز تۋىس- باۋىرمىز. وسى جاقىندىقتى كوزدىڭ قاراشىعىنداي ساقتاۋعا ءتيىسپىز. ايتا كەتۋىم كەرەك، قازاقستان قازىرگى پرەزيدەنتىنىڭ ارقاسىندا ادام تانىماستاي وزگەردى. دەپورتاتسيانى باستان كەشكەن نەمىستەر العىس ايتۋ كۇنىنە ايرىقشا ماڭىز بەرەدى، ارنايى اتاپ وتەدى. ولاردىڭ ۇعىمىندا، وتكەن ءومىر، كەلمەسكە كەتكەن كەزەڭ - تايعا تاڭبا باسقانداي تاريح. ال تاريح ەشقاشان ۇمىتىلماق ەمەس! سوندىقتان دا قيىن- قىستاۋ كەزەندە قول ءۇشىن بەرىپ، باۋىرىنا باسقان قازاق حالقىنا ولاردىڭ العىسى شەكسىز.
اۆتورلارى: شولپان نايمانبايەۆا، ميلوسلاۆ لاۆرينوۆسكي.
