رەسەي عالىمدارى راكتىڭ بارلىق ءتۇرىن ەمدەي الاتىن ءدارى ويلاپ تاۋىپتى

استانا. قازاقپارات -  رەسەيلىك عالىمدار قاتەرلى ىسىكتىڭ بارلىق ءتۇرىن ەمدەيتىن ءدارى ويلاپ تاپقانىن جانە عارىشتا سىناقتان ءساتتى وتكىزگەنىن مالىمدەدى. بۇل ەمدىك پرەپارات ءۇش- ءتورت جىلدا ناۋقاستارعا بەرىلە باستايدى.

بۇل تۋرالى «يزۆەستيا» گازەتىنە فەدەرال مەديكو- بيولوگيالىق اگەنتتىگىنىڭ اسا تازا پرەپاراتتار مەملەكەتتىك عىلىمي- زەرتتەۋ ينستيتۋتىنىڭ ديرەكتورىنىڭ ورىنباسارى اندرەي سيمبيرتسيەۆ ايتىپ بەردى، دەپ جازادى Kaz.tengrinews.kz.

باسىلىمنىڭ مالىمەتىنشە، بۇل پرەپارات بيوتەحنولوگيا ارقىلى جاسالعان جانە قاتەرلى ىسىكتى ەمدەۋگە ارنالعان جاڭا قۇرال. ايتۋىنشا، جەتىستىككە عارىشتا وتكىزىلگەن زەرتتەۋ ارقىلى قول جەتكىزىلگەن، وسىلايشا ينستيتۋت ونكولوگيادا ناعىز توڭكەرىس اكەلەتىن ءدارىنىڭ كلينيكا الدى سىناعىن اياقتادى.

«پرەپاراتىمىزدىڭ شارتتى اتاۋى - «جىلۋ شوگىنىڭ اقۋىزى» («بەلوك تەپلوۆوگو شوكا»). بۇل - ادامنىڭ سترەسسورلىق ءتۇرلى ىقپالىنا جاۋاپ رەتىندە كەز كەلگەن جاسۋشاسىمەن سينتەزدەلەتىن مولەكۋلا. مۇنىڭ بار ەكەنىن عالىمدار ەرتە كەزدەن بىلگەن. باستاپقىدا اقۋىزدىڭ جاسۋشانى زاقىمنان قورعايتىنى عانا كۇتىلدى. ال كەيىن ەرەكشە قاسيەتى بار ەكەنى انىقتالدى - جاسۋشاسىنداعى يممۋندىق جۇيەنىڭ ىسىنگەن انتيگەندەرىن كورسەتە الادى جانە وسىلايشا ىسىنۋگە قارسى يممۋندىق ىقپالىن كۇشەيتەدى»، - دەدى سيمبيرتسيەۆ.

https://kaz.365info.kz